تاند『دوشنبه د زمري ـ اسد ۲۰مه』د طالبانو د ټولګټو چارو وزارت وایي، تېره یوه اوونۍ کې د افغانستان د اوسپني پټلۍ له لارو ۱۰۳ زره او ۲۶۳ مټریک ټنه صادرات او واردات شوي دي.
د دغه وزارت ویاند محمد اشرف حق شناس نن (دوشنبه) ویلي چې، دغه انتقالات د روان ۱۴۰۴ لېږدیز لمریز کال د زمري میاشتې له ۱۰مې نیولې تر ۱۶مې شوي دي.
د حق شناس په وینا، په دغو انتقالاتو کې ۶۸ زره او ۲۲۷ ټنه د حیرتان، ۱۶ زره او ۵۳۷ ټنه د تورغونډۍ، ۱۲ زره او ۲۵۰ ټنه د هرات- خواف او شپږ زره ۲۴۹ ټنه د آقینې بندر له لارو شوي دي.
نوموړی زیاتوي چې، په دغو صادراتو او وارداتو کې ۵۹۷ ټنه د افغانستان صادرات شامل دي چي، لویه برخه یې وچه مېوه او د انارو جوس جوړوي.
د یادونې ته چې تر دې وړاندې اوونۍ کې هم یاد وزارت د افغانستان د اوسپني پټلۍ له لارو د شاوخوا ۹۷ زره ټنو انتقالاتو خبر ورکړی و.
اقتصادي کارپوهان دا ډول خبرونه هیله بښونکي یادوي او د وارداتو پر ځای د صادراتو پر زیاتوالي ټینګار کوي.
دوی وایي، که داخلي پانګونه او تولید زیات شي نو حتمي ده چې د وارداتو پر وړاندې د صادراتو کچه لوړېږي.