تاند، یکشنبه، د جوزا ۴ مه: ولسمشر غني د حسن نیت په موخه د ۲ زره طالب زندانیانو د ازادېدو خبر ورکړی دی.

ولسمشر نن مازیګر په دې اړه له خپل دویم مرستیال استاد سرور دانش، د سترګې محکمې رئیس سیدیوسف حلیم، د ملي امنیت سلاکار ډاکټر حمدالله محب، لوی څارنوال فرید حمیدي، فضل محمود فضلي، د ملي امنیت عمومي رئیس احمدضیا سراج او د زندانونو چارو د تنظیم عمومي رئیس احمد راشد توتاخېل سره ځانګړې ناسته کړې.

ولسمشر غني په دې غونډه کې د اختر په ورځو کې د طالبانو له لوري د اوربند اعلان ته د حسن نیت ښودلو په موخه د دوه زره طالب زندانیانو د ازادېدو بهیر د پیلولو دستور ورکړ.

بلخوا د طالبانو د سیاسي دفتر ویاند سهېل شاهین د دې اعلان هرکلی کړی او په خپل ټویټر یې لیکلي له مقابل جهت څخه د ۲۰۰۰ بندیانو د خلاصون اعلان یو ښه ګام دی.

د شاهین په خبره د دوحې په توافقنامه کې د ۵ زرو بندیانو د خلاصون غوښتنه د دې لپاره وه چې د اعتماد مناسبه فضا رامنځته شي: (( باید دغه پروسه تکمیل شي ترڅو د بین الافغاني مذاکراتو د پيل په مخکې خنډونه لیري شي او ورپسې پرمختګونو ته زمینه مساعده شي.))

سهېل شاهین زیاته کړې له دې سره هم مهاله طالبان هم په خپله خوا کې د بندیانو خلاصون ته متعهد دی.