تاند (دوشنبه، د زمري/ اسد ۱۳ مه) د ملګرو ملتونو د خوړو او کرنې ادارې (FAO) اعلان کړی چې د بریتانیا د حکومت په مالي ملاتړ په افغانستان کې د خوراکي امنیت او د کلیوالو د مقاومت د پیاوړتیا لپاره ۱۰ میلیونه پونډي پروژه پیل شوې ده.
د ګډ بیان له مخې، دا پروژه چې “د کرنیز معیشت د مقاومت لوړول” نومېږي، د ۲۰۲۶ کال تر مې میاشتې پورې به د افغانستان په ۱۵ ولایتونو کې له ۱۵۱ زرو څخه زیاتو کسانو ته خدمات وړاندې کړي.
د دې پروژې موخه د بزګرانو، مالدارانو او بېځمکو کارګرانو ملاتړ دی، څو تولید، عاید او د اقلیمي او اقتصادي شاکونو پر وړاندې مقاومت زیات کړي.
فاو یا د ملګروملتو د خوړو او کرنې اداره وايي، د دې پروژې په لومړي کال کې به د غنمو او لبنیاتو تولید لوړ شي، د اوبهخور سیستمونه به ورغول شي، بزګرانو ته به د لوړ کیفیت تخمونه ورکړل شي، او څاروي به د روغتیايي خدماتو او واکسین له لارې خوندي شي.
یادې ادارې ویلي، مېرمنې، په ځانګړي ډول کونډې او د ښځو تر سرپرستۍ لاندې کورنۍ، په دې پروګرام کې لومړیتوب لري.
ملګرو ملتونو ویلي چې د چرګانو د روزنې کڅوړې، د مالدارۍ روزنیز پروګرامونه، او بازار ته د لاسرسي ملاتړ هغه اقدامات دي چې د یادو مېرمنو د تغذیې ښه والي او د عوایدو د لوړوالي لپاره برابر شوي دي.
د FAO استازی ریچارډ ترنچارد وايي: “دا پروژه د بزګرانو د مقاومت د زیاتولو لپاره لاره هواروي. ښه تولید، ښه تغذیه، ښه چاپېریال او په پایله کې ښه ژوند، زموږ د دې پروګرام څلور اساسي هدفونه دي.”
د خوړو او کرنې ادارې زیاته کړې چې په تېرو دریو کلونو کې د دې ادارې له بیړنیو مرستو او د مقاومت له پروګرامونو څخه څه باندې ۳۰ میلیون کسان برخمن شوي دي.
د ګډ بیان له مخې، دا مرستې په هېواد کې د خوراکي امنیت د شدید بحران د کمولو لپاره اغېزمنې تمامې شوې دي.
د ” کرنیز معیشت د مقاومت لوړول” پروژه به “په افغانستان کې د کرنې او معیشت د دوامدار او عادلانه پرمختګ” له پروګرام سره یو ځای پراخ شي، چې دا د افغانستان د مقاومت کنسورشیم په مشرۍ د “افغاناید” موسسې لهخوا تطبیقېږي.
ملګري ملتونه وايي، دواړه پروژې د دوامدارې کرنې د ترویج، د طبیعي افتونو د خطر د کمولو، او د زیانمنونکو ټولنو د خوراکي امنیت د ښه کولو لپاره طرحه شوې دي.
د خوړو نړیوال پروګرام ټینګار کړی چې د کرنې ملاتړ د افغانستان د خوراکي ناامنۍ او خوارځواکۍ د کمولو لپاره تر ټولو مؤثره لار ده، او دا ډول مرستو ته دوام ورکول د دوامدارو پایلو لپاره حیاتي ارزښت لري.