تاند (چهارشنبه، د زمري/ اسد لومړۍ) د طالبانو د بهرنیو چارو وزیر، امیرخان متقي، وايي دوی تېر کال جرمني، ناروې، هند او اندونیزیا ته خپل دیپلوماتان معرفي کړي، او پر دې سربېره چې روسیې د طالبانو اسلامي امارت په رسمیت پېژندلی، قزاقستان هم چمتووالی ښوولی دی.
متقي نن په کابل کې یوې خبري غونډې ته وویل چې قزاقستان د طالبانو د سفیر د منلو ژمنه کړې او ډېر ژر به د دوی دا دیپلومات معرفي شي. نوموړي دا څرګندونې
تر دې وړاندې، روسیه، ترکیه، پاکستان، اماراتو، ازبکستان او چین هم د طالبانو سفیران منلي دي.
متقي، چې د خپل وزارت د تېر یوه کال د فعالیتونو په اړه څرګندونې کولې، وویل چې د روسیې له خوا د طالبانو رسمیت پېژندنه «یو بېساری اقدام او د پام وړ پرمختګ» دی.
متقي زیاته کړه: «موږ ټولو ته دا یادونه کوو چې اسلامي امارت د متوازنې بهرنۍ تګلارې له مخې، چمتو دی چې له ټولو هېوادونو سره د متقابل درناوي، ګډو ګټو او ګډو ګواښونو پر بنسټ تعامل ولري.»
متقي وویل، د بهرنیو چارو وزارت په تېرو ۱۲ میاشتو کې د طالبانو شاوخوا ۱۰۰ پلاوي د سیمې او ګاونډیو هېوادونو ته د سفر لپاره هماهنګ کړي دي. هغه ټینګار وکړ چې د دوی بهرنۍ پالیسي اقتصادمحوره او متوازنه ده، او غواړي له ټولو هېوادونو سره تعامل ولري.
سره له دې چې د طالبانو د واکمنۍ نژدې څلور کاله پوره کېدو ته نژدې شوی، یوازې روسیې تر اوسه طالبان په رسمیت پېژندلي،. نړیوالې ټولنې تل د بشري حقونو، په ځانګړي ډول د ښځو د حقونو، د درناوي غوښتنه کړې ده او ویلي یې دي تر څو چې طالبان په دې برخه کې خپل اقدامات اصلاح نه کړي، په رسمیت یې نه پېژني.