تاند『یکشنبه د چنګاښ ـ سرطان ۲۹مه』یو شمېر نړیوالو رسنیو د یوه نادولتي سازمان، مرسي کورپس د راپور له مخې ویلي چې ښايي کابل د نړۍ لومړنۍ پلازمېنه شي، چې د اوبو له سخت کمښت سره مخ او بشپړه وچه شي.
رسنۍ وایي دا کړکېچ کولای شي اقتصادي ځوړ هم رامنځته کړي.
راپورونو زیاته کړې، کابل درې لسیزې وړاندې تر ۲ ملیونو کم نفوس درلود، خو اوس د نفوس او اړتیاو له زیاتېدو سره د اوبو له سخت کمښت سره مخ ده.
ویل کیږي چې تېرو کلونو کې د اوبو ناسم مدیریت له امله د ځمکې لاندې اوبو کچه تر ۳۰ مترو ټیټه شوې ده.
تېره سه شنبه د چنګاښ ـ سرطان ۲۵مه د ملګرو ملتونو د خوړو او کرنې نړیوال سازمان (F.A.O) خبرداری ورکړی وو چې، وچکالۍ د افغانستان ۱۹ ولایتونه اغېزمن کړي دي.
یاد سازمان فاریاب یو له هغو ولایتونو یاد کړی وو چې، د وچکالۍ له امله سخت ځپل شوی او اوسېدونکي او کروندګر یې د اوبو او څړځایونو له کمښت سره مخ دي.
افغانستان کې د وچکالۍ په اړه اندېښنې ورځ تر بلې په زیاتېدو دي.
د نظر خاوندان یې لامل د خلکو او د حکومت بې پروایي بولي.
په دې وروستیو کې د ټولنیزو رسنیو یو شمېر فعالانو هم پر خلکو غږ کړی چې، د اوبو په کارولو کې احتیاط وکړي؛ څو هیواد مو له وچکالۍ څخه وژغورل شي.