تاند (شنبه، د چنګاښ/ سرطان ۲۱ مه) د پاکستان د بهرنیو چارو وزیر، محمد اسحاق‌ ډار، په کوالالمپور کې په یوه سیمه‌ییزه ناسته کې اعلان وکړ چې له ۲۰۲۱ کال راهیسې، چې طالبان بیا واک ته رسېدلي، د پاکستان او افغانستان ترمنځ هېڅ رسمي ډیپلوماتیکې اړیکې نه‌دي رامنځته شوي.

اسحاق ډار چې همداراز د پاکستان د راعظم مرستیال هم دی، څرګنده کړه چې د طالبانو د بیا واکمنېدو له پیل راهیسې، د اسلام‌آباد او کابل ترمنځ رسمي ډیپلوماتیکې اړیکې پرې شوي او تر اوسه هم بېرته نه‌دي رغول شوي.

دا په داسي حال کې ده چې د طالبانو له واک ته رسیدو وروسته د پاکستان د آی ایس آی د هماغه مهال مشر لومړنی بهرنی چارواکی و، چې کابل ته یې سفر وکړ او په کابل کې د پاکستان سفیر تر بل هر سفیر زیات فعال و.

ډار په کوالالمپور کې د ناستې پر مهال وویل:
«افغانستان زموږ ګاونډی دی، او موږ تل د دغه هېواد ثبات او امنیت د پاکستان لپاره مهم ګڼلی. خو له بده مرغه، د طالبانو له واک ته رسېدو وروسته، د دواړو هېوادونو ترمنځ هیڅ ډول رسمي تعامل نه شته.»

اسحاق‌ ډار د ۲۰۲۵ کال د اپرېل په ۱۹مه خپل یوه رسمي سفر ته اشاره وکړه او ویې ویل:
«په دغه یوه ورځني سفر کې مې له طالب چارواکو سره مستقیمې خبرې وکړې، څو د باور بیا رامنځته کېدو او د اړیکو د بیا پیل زمینه برابره شي، خو دا هڅې تر اوسه د رسمي اړیکو د رغېدو لامل شوي نه‌دي.»

نوموړي د مې په ۲۰مه، په بېجینګ کې د افغانستان، پاکستان او چین ترمنځ درې‌اړخیزه ناسته هم یاده کړه او هغه یې د سیمه‌ییزو همکاریو د پیاوړتیا یوه برخه وبلله.

د پاکستان د بهرنیو چارو وزیر زیاته کړه چې د دوه اړخیزو اړیکو له مهمو خنډونو څخه یو هم د تحریک طالبان پاکستان (TTP) حضور دی، چې د هغه په وینا، لا هم د افغانستان په خاوره کې فعالیت کوي.

هغه وویل:
«موږ له طالبانو غوښتي چې د دې ډلې د مخنیوي لپاره جدي ګامونه پورته کړي، ځکه چې دا ډله د پاکستان امنیت ته مستقیم ګواښ پېښوي.»

اسحاق‌ ډار ټینګار وکړ چې:
«ځینو پخوانيو اقداماتو لکه د سرحدونو پرانیستل او له طالبانو سره غیر رسمي تماسونه، زموږ ملي امنیت ته منفي پایلې درلودې او باید جدي بیاکتنه پرې وشي.»

نوموړي په پای کې وویل چې د پاکستان د توغندويي پروګرام پیاوړتیا یوه ستراتیژیکه اړتیا ده، څو له سیمه‌ییزو ګواښونو سره مقابله وشي.

سره له دې چې ځینې محدودې ډیپلوماتیکې هڅې شوې، لکه په اسلام‌آباد کې د طالبانو د استازولۍ د سفارت په کچه لوړول او ورته اقدام د پاکستان له لوري په کابل کې، لا هم د دواړو هېوادونو ترمنځ د رسمي ډیپلوماتیکو اړیکو د بیا پیل نښې نښانې نه‌لیدل کېږي.