تاند『پنجشنبه د چنګاښ ـ سرطان ۱۹مه』د طالبانو د ټرانسپورټ او هوايي چلند وزارت اړوند د هوا پېژندنې ادارې سبا (جمعه) په ۱۲ ولایتونو کې د بارانونو او تېزو بادونو اټکل کړی دی.
د دغه وزارت په خبرپاڼه کې زابل، غزنی، میدان وردګ، پکتیا، پکتیکا، خوست، لوګر، لغمان، ننګرهار، کنړ، نورستان او بدخشان ولایتونه یاد شوي دي.
سرچینه زیاتوي چې په یادو ولایتونو کې، له ۱۰ څخه تر ۳۵ ملي متره د باران اټکل شوی دی.
خبرپاڼه همدارنګه په سویلي، سوېل ختیځو، لوېدیځو او مرکزي ولایتونو کې د تېزو بادونو اټکل هم کړی چې، تېزوالي اندازه یې له ۵۰ څخه تر ۹۰ کیلومتره په یوه ساعت کې اټکل شوی دی.
دغه اټکل داسې مهال کېږي چې، د روانې اوونۍ په پیل کې په ننګرهار کې د سېلابونو او ورښتونو له امله دوه کوچنیانو ژوند بایلود او پنځه تنه نور ژوبل شول.
دغه راز تر ۵ زره جریبه زیاته کرنیزه ځمکه سیلابونو ړنګه او تر ۳۰۰ کورونه یې ویجاړ کړل.