تاند『پنجشنبه د چنګاښ ـ سرطان ۱۹مه』کابل کې د جاپان سفیر تاکایوشی کورومایا وایي، هر ماشوم د زدهکړو حق لري او هرې نجلۍ ته باید په ځانګړې توګه په روغتیایي برخو کې د زده کړو زمینه برابره شي.
هغه افغانستان کې پر نجونو د ښوونیز بندیز له امله اندېښنه څرګنده کړې.
نوموړې زیاته کړه چې په روغتیایي برخه کې د ښځو ډاکټرانو تشه محسوسیږي.
جاپاني سفیر ویلي، که ښځو او نجونو ته د زده کړو زمینه برابره نشي نو افغانستان کې به روغتیایي خدمات له ګواښ سره مخ شي.
تاکایوشي کورومایا له طالبانو غوښتي چې د نجونو او ښځو پر وړاندې تر شپږم ټولګي پورته د ښوونځیو او پوهنتونونو دروازې پرانیزي.
دغه راز جاپان”افغانستان کې د پولیو لهمنځه وړلو” د یو کلن پروګرام لپاره د ملګرو ملتونو د ماشومانو د ملاتړ له صندوق (یونیسف) سره پنځه میلیونه ډالر مرسته کړې ده.
ټاکل شوې چې دغه یو کلن پروګرام کې به څه باندې ۱۳ میلیونه ماشومانو ته د پولیو واکسین تطبیق شي.
کابل کې د جاپان سفیر په دې تړاو جوړې شوې غونډې ته ویلي، هېواد یې له تېرو شلو کلونو راهیسې د یونیسف له مهمو شریکانو دی چې د افغان ښځو او ماشومانو ملاتړ یې کړی دی.