تاند『چهارشنبه د چنګاښ ـ سرطان ۱۸مه』د امریکا په ټکساس ایالت کې د تېرې اوونۍ د سېلابونو له امله د مړو شمېر ۱۰۹ تنو ته ورسېده.
په دغه شمېر مړو کې لسګونه تنه یې ماشومان دي.
د رویټرز خبري اژانس د راپور له مخې، د سېلابونو له امله لا هم ۱۸۰ تنه نادرکه دی، چې د برخلیک په تړاو یې څه نه ویل کېږي.
چارواکو وایي، د لټون عملیاتو سره ښایي د مړو په شمېره کې زیاتوالی راشي.
بل لورته د امریکا په نیو مکسیکو کې د تازه سېلابونو له امله لسګونه کسان په کورونو او موټرو کې بند پاتې دي.
ځایي چارواکي وايي، چې په دغه سیمه کې له وړاندې د ژغورنې ډلې ځای پر ځای کړې وې، چې لږ تر لږه ۸۵ بېړنۍ ژغورنې شوې دي.
د نیو مکسیکو د سېلابونو له امله تر اوسه د مرګ ژوبلې او د نادرکۍ راپورونه نه دي ورکړل شوي.