تاند「دوشنبه د چنګاښ ـ سرطان ۲مه」د طالبانو د حکومت د بهرنیو چارو سرپرست وزیر ویلي، د اسلامي همکاریو سازمان غړي هېوادونه دې د فلسطین او ایران پر خلاف د اسرائیلي رژیم د ظلمونو مخه ونیسي.
امیرخان متقي د اسلامي همکاریو سازمان د بهرنيو چارو وزيرانو ۵۱مه غونډه کې دا غوښتنه کړې ده.
نوموړي زیاته کړې چې د دې حالت دوام د سیمې د ټولو هېوادونو امنیت ته مستقیم ګواښ او ویجاړونکي عواقب لرلی شي.
متقي پخپله وینا کې د افغانستان پر اوسني وضعیت هم خبرې وکړې او ټینګار یې وکړ چې افغانستان له کلونو جګړو، بهرنیو لاسوهنو او اشغال وروسته د خپلواکۍ، ثبات او بیا ودانولو مرحلې ته داخل شوی دی.
نوموړي زیاته کړې ، چې دا وخت دی چې اسلامي نړۍ باید د شته ننګونو له امله د وروسته پاتې والي په اسبابو ژور فکر وکړي تر څو وکولی شو، چې راتلونکي نسل لپاره د داسې ګډ هویت تعریف وړاندې کړو، چې د بهرنیو پدیدو پرځای پر خپل اسلامي تاریخ او تمدن افتخار وکړي.
متقي ویلي، چې اسلامي نړۍ له نویو راټوکېدونکو ننګونو سره مخ ده چې د پرمختګ او بیارغونې مسیر یې له لویو ستونزو سره مخ کړی دی.