تاند「شنبه د غبرګولي ـ جوزا ۱۷مه」د روغتیا نړیوال سازمان په افغانستان کې د کانګو تبې د خپرېدو د خطر زیاتېدو خبرداری ورکړی.
یاد سازمان له افغانانو یې غوښتي چې، د لوی اختر په شپو ورځو کې روغتیايي تدابیر جدي ونیسي.
د روغتیا نړیوال سازمان زیاتوي د دې ناروغۍ د خپرېدو د مخنیوي لپاره باید څاروي له روغتیايي تدابیرو سره یوځای آزاده فضا او د استوګنې له ځایونو لرې حلال شي.
بل لورته طالبانو هم له ټولو افغانانو غوښتنه کړې چې پاکوالي ته جدي پام وکړي او د خپلې روغتیا لپاره د قربانۍ پاتې شونې په لارو کوڅو کې ونه غورځوي.
دوی نن د اختر په لمانځه کې د ښاروالیو د ناحیو له لوري عامو خلکو ته په لیکلې بڼه دغه پیغامونه استولي وو.
د کانګو تبه خطرناکه ویروسي ناروغي ده.
دغه ناروغي له څارویو انسان او کله کله له انسانانو هم یو بل ته انتقالېدای شي.
ډاکتران وايي که دا تبه شدیده شي، د مړینې لامل کېږي.