تاند (چهارشنبه، د غبرګولي/ جوزا ۱۴ مه) په ملګرو ملتونو کې د پاکستان دایمي استازي منیر اکرم د ملګروملتو په امنیت شورا کې د طالبانو د بندیزونو د کمیټې، چې د ۱۹۸۸ په نوم مشهوره ده، مشري په غاړه واخیسته.

 دا کمیټه، چې د ملګروملتو د امنیت شورا له خورا جوړه شوې، د طالبانو په وړاندې د نړیوالو بندیزونو د پلي کولو او څارنې مسوولیت لري.

د هندوستان د «اکانومیک ټایمز» ورځپاڼې د راپور له مخې، منیر اکرم په داسې حال کې د دې کمېټې مشر ګومارل شوی چې چین هڅه کوي د پاکستان او طالبانو ترمنځ اړیکې ښې کړي او په افغانستان کې د پاکستان رول پیاوړی کړي.

د دې کمیټې مرستیالان د ګویان او روسیې هېوادونو استازي ټاکل شوي دي. د هندوستان رسنۍ دې ګام ته د پاکستان د ستراتېژيک ځای د لوړولو په برخه کې یو مثبت او اغېزمن فرصت بللی دی.

پاکستان به د دې مسوولیت په اخیستو سره په طالبانو پورې اړوند د بندیزونو او نړیوالو تګلارو په پروسه کې مهم رول ولوبوي او کولای شي له طالبانو سره د دیپلوماټیکو او اقتصادي اړیکو په اسانولو کې اغېزمن ثابت شي.

د ملګرو ملتونو د امنیت شورا د ۱۹۸۸ کمیټه د طالبانو پر وړاندې د بندیزونو د ټاکلو او پلي کولو مسوولیت لري او دغه بندیزونه له هغه وخت راهیسې چې طالبان په ۲۰۲۱ کال کې واک ته رسېدلي، د دې ډلې د فعالیتونو د کنټرول او د سیمې د امنیت د ساتنې لپاره د نړیوالې ستراتېژۍ برخه ده.

پاکستان په داسی حال کې د دې کمېټې مشري په دې کمیټه کې مشري په غاړه اخلي چې په افغانستان کې د دغه هېواد رول او په ځانګړي ډول له چین سره د دیپلوماټیکو همکاریو په مټ د پاکستان سیمه‌ييز اهمیت ورځ تر بلې زیاتېږي.