تاند【شنبه د غبرګولي ـ جوزا ۳مه】د طالبانو د حکومت د ټولګټو چارو وزارت وایي، د سالنګ لویې لارې د پاتې برخو د اساسي رغونې چارې یې پیل کړې.
یاد وزارت له مسافر وړونکو وسایطو غوښتنه کړې چې په ۲۴ ساعته توګه دې د سالنګ له بدیلې لارې تګ راتګ وکړي.
سرچینې په یوه خبرپاڼه کې زیاته کړې چې د سالنګ له اصلي لارې به یوازې بار وړونکو موټرو ته یوه شپه له شماله، سویل ته او بله شپه له سویله، شمال ته د تګ راتګ اجازه ورکوي.
په ورته وخت کې یاد وزارت ویاند محمداشرف حق شناس ویلي، د کار ښه ترسره کېدو په موخه به د یادې لارې اصلي مسیر د وسایطو پرمخ تړل کیږي او مسافر وړونکي موټر کولی شي له چمتو شوې بدیلي فرعي لارې تګ راتګ وکړي.
نوموړي له هېوادوالو غوښتي د دغې مهمي بنسټیزې پروژې د روان کال کاري پلان بشپړېدو پورې دي کاري ډلو سره مرسته وکړي.
د یادونې ده، چې د سالنګ لویې لارې څو برخې تېر کال د ټولګټو وزارت له لوري په اساسي ډول بیارغول شوې او اوس یې د پاتې برخو کارونه پیل شول.