تاند【پنجشنبه د جوزا ـ غبرګولي لومړۍ】د لغمان په مرکز مهترلام کې د شپږ ملیونه افغانیو په لګښت د یوې لمریزې برېښنا پروژې د جوړولو چارې پیل شوې.
افغانستان کې د طالبانو د حکومت د برښنا شرکت عمومي مشر عبدالباري عمر وایي، دا پروژه د یوه خصوصي شرکت په مالي لګښت د شپږ ملیونه ډالرو په لګښت جوړېږي، چې د شپږ میاشتو په موده کې به یې چارې بشپړې شي.
نوموړی زیاتوي چې د دغې پروژې په بشپړېدو سره به لس زره کورنۍ او واړه کاروباریان له برښنا برخمن شي.
په ورته وخت کې د طالبانو د ریاست الوزراء اقتصادي مرستیال ملا عبدالغني برادر
وویل، چې په ټول هېواد کې یې له خصوصي سکتور سره د ۷ برښنایي پروژو قراردادونه کړي.
نوموړی زیاتوي، چې د دې پروژو بشپړېدو سره به د برښنا مجموعي ظرفیت ۲۲۸.۴۵ میګا واټو ته ورسېږي.
ملابرادر زیاتوي” لغمان هم په دغه لیست کې شامل دی، دا دی نن په دې ولایت کې د ۶ ملیونه ډالرو په ارزښت د ۱۰ میګاواټه لمریزې برېښنا د تولید شبکې چارې پیل شوې چې شپږ میاشتو کې به یې چارې بشپړې شي.”