تاند (سې شنبه، د غويي/ ثور ۱۵ مه) د ملګرو ملتونو د سرمنشي پخواني مرستیال او د هند د پارلمان غړي شاشي کرېشنن تارور، د اسلاماباد او کابل ترمنځ له تاوتریخوالي ډکو اړیکو ته په اشارې ویلي، پاکستان نور په افغانستان کې په طالبانو کې نفوذ نه لري او دا وضعیت د پاکستان لپاره په یوه ستراتیژیکه جبۍ (باطلاق) بدل شوی دی.
شاشي کرېشنن تارور، چې دا مهال د هند د پارلمان غړی دی، په یوه شننه کې چې «پراجکټ سیندیکیټ» ویبپاڼې خپور کړی، د پاکستان او طالبانو ترمنځ اړیکې څېړلي او ویلي یې دي چې اسلاماباد خپل پخوانی نفوذ پر طالبانو له لاسه ورکړی دی.
تارور ویلي چې پاکستان غوښتل د طالبانو په ملاتړ په افغانستان کې خپل نفوذ ټینګ کړي او د هند پر وړاندې ستراتیژیکه ژورتیا رامنځته کړي، خو طالبان له نظامي بریالیتوب وروسته د اسلاماباد له کنټروله وتلي دي.
نوموړي د طالبانو د حکومت او د پاکستان د پوځ ترمنځ وروستیو سرحدي شخړو ته، او همداراز د افغان حکومت هغه اعلامیې ته اشاره کړې چې پکې د هند تر واک لاندې کشمیر کې پر سیلانیانو د برید غندنه شوې وه. هغه دا اقدامات له پاکستانه د طالبانو د لرې کېدو نښې بللې دي.
دغه هندي سیاستوال زیاته کړې: د پاکستان پوځ د طالبانو له نظره اسلامي نه دی، او اوس تحریک طالبان پاکستان هڅه کوي، لکه څنګه چې طالبانو په افغانستان کې واک ترلاسه کړ، همداسې په اسلاماباد کې هم یو اسلامي دینسالاره حکومت جوړ کړي.
تارور خبرداری ورکړی چې افغانستان نور د پاکستان لپاره یوه پانګه نه ده، بلکې یو دروند بار او جنجال دی.
نوموړي دا هم ادعا کړې چې ځینې پاکستاني چارواکو وړاندیز کړی چې امریکایي بېپیلوټه الوتکو ته دې اډې ورکړل شي څو له افغانستان څخه د یاغیانو پر ضد کار واخیستل شي؛ چې دا اقدام د اسلاماباد له پخوانیو سیاستونو سره څرګند تضاد لري.
د هند د پارلمان دغه غړي په پای کې لیکلي چې هند باید دا پرمختګونه له نژدې وڅاري، ځکه دا به د سیمې پر امنیت ژور اغېز ولري.