تاند【سه شنبه د ثور ـ غویي ۱۶مه】د پاکستان د بهرنیو چارو وزارت وايي، د دوی په غوښتنه د ملګرو ملتونو امنیت شورا د سیمې د خرابېدونکي امنیتي وضعیت په تړاو مشورتي غونډه کړې.
پاکستان په دې ناسته کې، په سیمه کې وروستۍ ترینګلی حالت لامل د هند پاروونکې کړنې بللې دي.
پاکستان تور پورې کړی، چې هند غواړي پر پاکستان د پهلګام پېښې د مسوولیت اچولو سره خپله دولتي ترهګري او د دغه هېواد دننه او نورو ځایونو کې هدفي وژنې پټې کړي.
د هند او پاکستان کړکېچ په کشمیر کې د پهلګام له پېښې وروسته تازه شوی.
په یاد وسله وال برید کې ۲۶ هندي سلانیان ووژل شول او ۱۷ نور ټپیان کړل.
د امنیت شورا غړو په سیمه کې وضعیت د لا خرابېدو پر خطر ژوره اندېښنه څرګنده کړې.
پاکستان د ملګرو ملتونو د سرمنشي او د امنیت شورا د غړو د خبرو اترو او تاوتریخوالي کمولو غوښتنې هر کلی داسې مهال کړی، چې تېرو درې ورځو کې یې د عملیاتي چمتوالي په موخه دوه توغندي ازمایلي دی.
پاکستان پرون دوشنبه هم ویلي وو، چې د هند وروستي اقدام په اړه به د ملګرو ملتونو امنیت شورا ته شکایت وکړي.