تاند【پنجشنبه د ثور ـ غویي ۴مه】د هند تر ولکې لاندې کشمیر کې پر سیلانیانو تر برید وروسته د زیاتېدونکي کړکېچ پر دوام، پاکستان نن (پنجشنبه، د غویي ۴مه) د هند د اقداماتو په غبرګون کې د واګه بندر تړلی دی.
پاکستاني رسنۍ وایي، دغه پرېکړه د دغه هېواد د لومړي وزیر، شهباز شریف په مشرۍ د ملي امنیت کمېټې په غونډه کې شوې.
د اسلاماباد او نوي ډیلي ترمنځ کړکېچ وروسته له هغې زیات شو چې د هند تر ولکې لاندې کشمیر کې په یوه برید کې ۲۶تنه سېلانیان ووژل شول.
امریکا خپل وګړي کشمیر ته له سفر کولو منع کړل
تر دې وړاندې د یاد برید له امله د هند حکومت له پاکستان سره ځمکنۍ پولې تړلي؛ ډيپوماټيکې اړیکې یې محدودې کړي او د پاکستان وګړو سربېره یې له ډيپوماټانو غوښتي، چې له دغه هېواده ووځي.
په کشمیر کې پر سیلانیانو تر برید وروسته د امریکا د بهرنیو چارو وزارت هم په یوه خبرتیا کې له خپلو وګړو غوښتي، چې کشمیر ته له سفر کولو ډډه وکړي.