نن د یکشنبې په ورځ د پښتون ژغورنې غورځنګ (PTM) له لوري په ډنمارک (آغوس) او بلجیم (بروکسل) ښارونو کې د پاکستان له خوا د افغان کډوالو د جبري شړلو او زورولو پر ضد احتجاجي لاریونونه ترسره شول.
لاریون کوونکو د پاکستاني حکومت دغه چلند غیر اسلامي، غیر انساني او د نړیوالو بشري قوانینو خلاف وباله.
د PTM ډنمارک مشر میرویس سالم وزیر او د بلجیم مشر وحید شیرزاد په خپلو ویناوو کې د پاکستان له خوا د افغان کډوالو پر وړاندې روان ظلم وغنده او له نړیوالو ادارو یې د بیړني اقدام غوښتنه وکړه.
دوی ټینګار وکړ چې زرګونه افغان کډوال، چې ښځې، ماشومان او زاړه پکې شامل دي، له کورونو ایستل شوي، شتمنۍ یې لوټ شوې او حتا د قانوني اسنادو لرونکي کورونه هم نړول شوي دي.
لاریونوالو له اروپايي اتحادیې، ملګرو ملتونو، د بشري حقونو سازمانونو او نورو آزادو ملتونو غوښتنه وکړه چې د افغان کډوالو ملاتړ وکړي او دا ناقانونه جبري شړل ژر تر ژره بند شي.