تاند (شنبه، د وري/ حمل ۳۰ مه) د پاکستان د بهرنیو چارو وزیر او مرستیال صدراعظم اسحاق ډار نن (شنبې) په کابل کې د طالبانو له مشرانو سره د امنیت، سوداګرۍ، ترانزیت او د خلکو ترمنځ د اړیکو په برخو کې دوه اړخیزې همکارۍ د زیاتولو په اړه خبرې وکړې.

پاکستاني رسنیو د خپل هیواد د باندنیو چارو وزارت پر اساس راپور ورکړ چې اسحاق ډار د افغانستان له سرپرست صدراعظم ملا محمد حسن اخوند او د بهرنیو چارو له سرپرست وزیر مولوي امیر خان متقي سره ولیدل. په دې کتنو کې دواړو خواوو د دوه اړخیزو ګټو اړوند مسایل وڅېړل.

 د پاکستان د بهرنیو چارو وزارت ویاند وویل چې د خبرو تمرکز د سیمې پر امنیت، د سوداګرۍ او ترانزیت پر پراخوالي او د سرحدي اړیکو پر پیاوړتیا وو.

اسحاق ډار ټینګار وکړ چې د شخړو، په ځانګړې توګه د سرحدي مدیریت او امنیت اړوند مسلو حل کول ډېر ضروري دي، چې د سیمې د سوداګرۍ او اتصال لپاره لاره هواره شي.

نوموړي زیاته کړه: «پاکستان د ورور هیواد افغانستان پرمختګ او هوساینه غواړي.»

دواړو هیوادونو د خلکو ترمنځ د اړیکو پر پیاوړتیا او د داسې چاپېریال پر رامنځته کولو توافق وکړ چې د سیمه‌ییزې سولې او ګډې سوکالۍ ملاتړ وکړي. دواړو لوریو ژمنه وکړه چې د باور جوړونې او همکارۍ د ژورولو لپاره به د لوړې کچې تماسونو ته دوام ورکوي.

کله چې اسحاق ډار د کابل د بهرنیو چارو وزارت ته ورسېد، نو د طالبانو د بهرنیو چارو وزیر مولوي امیر خان متقي یې هرکلي وکړ. دواړو خواوو ژمنه وکړه چې د سیاسي او اقتصادي اړیکو د لا پیاوړتیا لپاره به ګډ کار ته دوام ورکوي.

په همدې حال کې د افغانستان د باندنیو چارو وزارت وايي، امیرخان متقي د پاکستان د باندنیو چارو وزیر ته وویل چې د افغان کډوالو د بشري حقونو د سرغړونو مخه دې ونیول شي.

پاکستاني لوري ژمنه کړې، چې له افغان کډوالو سره به ښه چلند کېږي او د هغوی جایدادونه او مالونه خوندي دي.
د ناستې په پای کې دواړو خواوو د ګډو کمېټو پر جوړولو او د ستونزو د حل لپاره پر مؤثرو لارو چارو هوکړه کړې.
همداراز ښاغلي اسحاق ډار مولوي امیر خان متقي ته پاکستان ته د رسمي سفر بلنه ورکړې.

پاکستان د طالبانو، ملګروملتو او د بشري حقونو د سازمانونو له غوښتنو سره سره د افغان کډوالو جبري ایستلو ته دوام ورکړی او یوازې یې په تېرو ۱۸ ورځو کې ۸۰ زره کډوال افغانستان ته استولي دي.