تاند (شنبه، د وري/ حمل ۳۰ مه) د اروپايي اتحادیې احصایې ښيي چې د ۲۰۲۴ کال په اوږدو کې، په دې اتحادیه کې د پناه غوښتنو شمېر تر یو میلیون کم شوی دی.
په ۲۰۲۴ میلادي کال کې، د اروپايي اتحادیې په غړو هېوادونو کې د پناه غوښتونکو شمېر په لومړی ځل ۹۱۲ زرو کسانو ته راټیټ شوی، چې دا د تیر کال پرتله ۱۳ سلنه کم دی.
سوریان تر ټولو لویه ډله پناه غوښتونکي وو، چې له ۱۴۸ زرو نوو غوښتنو سره یې د ټولې اتحادیې ۱۶ سلنه جوړوله. تر سوریانو وروسته، ونزویلایان (نژدې ۷۳ زره غوښتنې) او افغانان (شاوخوا ۷۲ زره غوښتنې) په دوهم او درېیم ځای کې وو.
د راپور له مخې، د پناه غوښتنو په دې شمېر کې ۳۶ زره بېسرپرسته ماشومان هم شامل وو، چې زیاتره یې د سوریې (۳۲٪)، افغانستان (۱۶٪) او مصر (۸٪) وو.
جرمني د ټولو غوښتنو څلورمه برخه ترلاسه کړې، هسپانیا (۱۸٪) په دوهم، ایټالیا (۱۷٪)، فرانسه (۱۴٪) او یونان (۸٪) بیا په درېیم، څلورم او پنځم ځای کې راغلي.
قبرس د پناه غوښتنو تر ټولو لوړه کچه تجربه کړې
که څه هم جرمني او نور لوی هېوادونه د پناه غوښتنو ډېره برخه ترلاسه کوي، خو قبرس د هر زرو خلکو په وړاندې د ۷.۲ غوښتونکو له امله د پناه غوښتنې تر ټولو زیات فشار تجربه کړی، په داسې حال کې چې د اروپايي اتحادیې عمومي اوسط په هر زرو کسانو کې دوه پناه غوښتونکي دي.
تیره میاشت، قبرس په سمندر کې د ژغورنې لوی عملیات وکړل، چې پکې د کډوالو یوه کښتۍ د مدیترانې د ټاپو له ساحله ۴۵ کیلومتره لرې ډوبه شوه. په دې پېښه کې لږ تر لږه ۲۰ کسان سپاره وو، خو یوازې دوه تنه ژوندي پاتې شول.
د اروپايي اتحادیې د سرحدونو د خوندیتوب ادارې په وینا، دا عملیات د مدیترانې په ختیځو سیمو کې له پولو د کډوالو د غیرقانوني تېرېدو د زیاتوالي له امله سخت شوي دي.
اړوند معلومات
د پناه غوښتنې د هر زرو کسانو په حساب، یونان له قبرس وروسته (۶.۶ غوښتونکي) د پناه غوښتنې دوهم تر ټولو لوړه کچه لري. ایرلند او هسپانیا (۳.۴)، او لوګزامبورګ (۳.۲) هم د پناه غوښتونکو لپاره له هغو هېوادونو څخه دي چې ډېرې غوښتنې ورته استول شوې دي.