تاند (شنبه، د وري/ حمل ۳۰ مه) د بلوچستان د ازادۍ پوځ وايي (BLA): چې د بلوچستان په دشت، نصیرباد، تربت او نوشکي کې یې څلور بریدونه کړي دي.
دې بېلتون غوښتونکې ډلې تېره شپه په یوه خبرپاڼه کې ادعا وکړه چې دا عملیات یې د بمښخونې، وسلوالو نښتو او د لارو بندولو له لارې کړي دي.
د دوی د ویاند، جیاند بلوچ، په وینا، تېر سهار د کیچ ولسوالۍ د دشت سیمې په درچکو سیمه کې د BLA جنګیالیو د پاکستاني پوځ د بم خنثی کولو ډلې پر پیاده پرسونلو د ماین چاودنه کړې ده، چې له امله یې یو عسکر وژل شوی او دوه نور ټپیان شوي دي.
په بل برید کې، چې د پنجشنبې شپې ناوخته وشو، د بلوچستان د ازادي پوځ ځواکونو د نصیرباد په نوټال سیمه کې پر لویه لاره دوه ساعته د تلاشۍ پوسته جوړه کړې وه. د دوی په وینا، کله چې پولیسو د پر مختګ هڅه وکړه، نو د جنګیالیو له خوا یې پرې برید وشو او پولیس شا ته وتمبول شول.
درېیم برید د تربت ښار «سټار پلس مارکېټ» ته څېرمه شوی، چې د بلوچستان د ازادۍپوځ جنګیالیو د پاکستاني پوځ پر سرتېرو د لاسي بم برید کړی دی.
په څلورم برید کې، د نوشکي ولسوالۍ په قدیراباد سیمه کې د بلوچستان د ازادۍ جنګیالیو د نقیبالله ولد میراجان مینګل په نوم یو تن په وسلهوال برید کې وژلی. دوی ادعا کوي، چې نقیبالله که څه هم رسماً له پوځ څخه وتلی و، خو پټ یې د پوځ د استخباراتو (MI) لپاره د اجنټ او همکار په توګه کار کاوه.
په بیان کې راغلي، چې نقیبالله به د خلکو پر ضد اطلاعات ورکول، ځوانان به یې د پوځ لپاره جذبول او جبري تښتونو ته یې زمینه برابروله.
د بلوچستان د ازادۍ پوځ ویلي، هغه کسان چې د اشغالګر پاکستاني پوځ لپاره همکاري کوي، د دوی د استخباراتي څانګې «زېراب» تر څار لاندې دي او هماغسې برخلیک به ولري، لکه څنګه چې نقیبالله درلود.
د پاکستان پوځ تراوسه پورې د بلوچستان د ازادۍ پوځ د ادعاوو په اړه څه نه دي ویلي.
د بلوچستان په ډېرو برخو کې ازاد خبریالان د فعالیت اچازه نه لري نو له همدې کبله په دې سیمه کې هر ډول ادعاوې په خپلواک ډول نه شي تایید کېدای.