تاند (چهارشنبه، د وري/ حمل ۲۰ مه) له پاکستان څخه د افغان کډوالو د ستنېدو لړۍ دوام لري، او د سېشنبې په ورځ ۳۶۶۹ نور افغانان د تورخم له لارې بېرته افغانستان ته واستول شول.
د کډوالو چارو د ادارې رسمي اسناد ښيي چې د روان کال د اپرېل له لومړۍ نېټې راهیسې د بېرته ستنولو د بهیر له پیله، ټولټال ۱۱۳۷۱ افغانان بېرته خپل هېواد ته ستانه شوي دي. د پاکستاني چارواکو په وینا، دا بهیر د قانوني مراحلو تر بشپړېدو وروسته ترسره کېږي.
د اسوشیتید پریس خبري اژانس د راپور له مخې، د کډوالو چارو سرچینو ویلي، د سې شنبې په ورځ ۲۲۴۲ ناقانونه افغانان په خپله خوښه د لنډي کوتل ترانزیټ کمپ ته ورغلي وو.
د اړینو قانوني اسنادو او مراحلو له بشپړېدو وروسته، دوی د تورخم له لارې بېرته افغانستان ته واستول شول. سربېره پر دې، ۱۴۲۷ هغه کسان چې د پاکستان په بېلابېلو ښارونو کې نیول شوي وو، مستقیم تورخم ته د ستنېدو لپاره انتقال کړل شول.
د اپرېل له لومړۍ نېټې راهیسې، ټولټال ۱۱۳۷۱ افغانان بېرته خپل هېواد ته ستانه شوي دي.
همداراز، د ۲۰۲۳ کال د سپتمبر له ۱۷مې نېټې د ۲۰۲۵ کال تر مارچ پورې، شاوخوا ۴۶۹۱۵۹ افغانان چې له ۷۰۴۹۴ کورنیو سره تړاو لري، د تورخم له لارې افغانستان ته ستانه شوي دي.
په ورته وخت کې، په پاکستان کې د ناقانونه بهرنیو وګړو، په ځانګړي ډول افغانانو پر ضد عملیات دوام لري.
د چارواکو په وینا، پولیس او د ولسوالۍ اداري ډلې په ټول هېواد کې چاپې وهي، او پر هغو کسانو تمرکز کوي چې د افغان تابعیت کارت (ACC) لري، وېزې یې ختمې شوي یا هیڅ قانوني اسناد نه لري.
خو افغان اتباع چې د ثبت د ثبوت (PoR) قانوني کارتونه یا د اوسېدنې اسناد لري، دا مهال نه نیول کېږي. سره له دې، که هر داسې کس یا د هغه د کورنۍ کوم غړی په جرمونو کې ښکېل وموندل شي، چارواکو پرېکړه کړې چې ټولې کورنۍ ته به سزا ورکړي او بېرته به یې افغانستان ته وشړي.
دا کسان له اړینو قانوني مراحلو بشپړولو وروسته د خیبر ولسوالۍ د لنډي کوتل له ترانزیټ کمپ څخه د تورخم له لارې افغانستان ته واستول شول. دغه شړل شوي کسان د پاکستان له بېلابېلو ښارونو انتقال شوي وو.
د کډوالو د چارو سرچینو زیاته کړې، چې د ۲۰۲۳ کال د سپتمبر له ۱۷مې نېټې له ټول پاکستان څخه د بېرته ستنولو د بهیر له پیل څخه د ۲۰۲۵ کال د مارچ تر پایه پورې، ټولټال ۷۰۴۹۴ افغانې کورنۍ چې ۴۶۹۱۵۹ کسان په کې شامل دي، افغانستان ته ستانه شوي دي.