تاند【چهارشنبه د حمل ـ وري ۲۰مه】رویټرز خبري آژانس د خپلو سرچینو له قوله ویلي، چې د ټرمپ حکومت د شپږو بېړنیو خوراکي مرستو د پروګرامونو د بېرته پيل اقدام کوي.
د راپور له مخې د ټرمپ اداره دغه پروګرامونه په لبنان، سوریه، سومالیا، عراق او ځینو نورو هېوادونو کې پیلوي.
امریکا داسې مهال دا پروګرامونه پیلوي، چې په دې نوملړ کې د افغانستان نوم نشته.
سره له دې چې د خوړو نړیوال پروګرام له دې وړاندې د مرستو بندېدو له امله د ناوړه پایلو خبرداری ورکړی، خو رویټرز ته سرچینو ویلي، چې تر اوسه هېڅ داسې څرک نشته چې دغو مرستو کې دې افغانستان شامل شي.
د رسنیو د راپورونو له مخې جرمي لوین، د امریکا د نړیوالې پراختیا ادارې (USAID) سرپرست رییس، ویلي چې د مرستو د بندېدو او بېرته پيلېدو د ناڅاپي بدلونونو له امله خواشینی دی او د دغو پرېکړو پوره مسوولیت پر غاړه اخلي.
د امریکا د بهرنیو چارو وزارت هم د سه شنبې په ورځ ومنله، چې په افغانستان او یمن کې د مرستو د بندېدو علت دا دی چې وېره شته ترهګرې ډلې به له دغو بشري مرستو ناوړه استفاده وکړي.
بل لورته د ملګرو ملتونو په تازه راپور کې شاوخوا ۲۳ ملیونه افغانان مرستو ته اړ بلل شوي چې د بشري ناورین زیاتېدو اندېښنې یې پیدا کړې دي.
د نظر خاوندان اوسمهال نړیوالو بشري مرستو ته د افغانانو اړتیا جدي ګڼي او ټینګار کوي، چې نړیواله ټولنه په ځانګړې توګه امریکا باید د لاسنیوي برخه کې خپل مسوولیت ومني.
هغه اړمن افغانان کې دې مرستو څخه برخمن دي وایي، تمه لري چې ټرمپ به د افغانستان پر وړاندې خپل سخت دریځ نرم کړي.
دوی زیاتوي که نړیوالې بشري مرستې ودرېږي نو ملیونونه افغانان به له سختې لوږې سره مخ او ماشومانو کې د خوارځواکۍ کچه به په بې ساري ډول لوړه شي.