تاند【چهارشنبه د حمل ـ وري ۲۰】د امریکايي رسنیو د راپورونو له مخې د امریکا نړیوالې پراختیايي ادارې یا USAID د ۲۰۸ افغان نجونو بورسیې لغوه کړې دي.
د یادو بورسیو په مرسته یاد شمېر افغان نجونو د افغانستان امریکايي پوهنتون کې زده کړې کولې.
د سرچینې د راپور پر بنسټ، دغه افغان نجونې چې په حضوري او انلاین بڼه یې زده کړو ته دوام ورکړی و، یو شمېر ایمیلونه ترلاسه کړي دي چې له مخې به یې د امریکا په مالي ملاتړ روانې بورسیې لغوه شي.
تر اوسه د یادو افغان نجونو زده کوونکو د راتلونکي برخلیک په تړاو څه نه دي ویل شوي.
له دې وړاندې په عمان هېواد کې د ۸۲ افغان نجونو زده کوونکو بورسیې چې د امریکا نړیوالې پراختیايي ادارې له لورې تمویلېدې، هم د سمسترونو په نیمايي کې لغوه شوې وې.
دا بورسیې داسې مهال لغوه کېږي، چې په افغانستان کې د طالبانو له لوري د نجونو پر هر ډول زده کړو بندیزونه لګول شوي دي.