تاند【شنبه د حمل ـ وري ۱۶مه】سویلي اسیا لپاره د بښنې نړیوال سازمان په یوه تازه کمپاین کې له پاکستانه غوښتي، چې د افغان کډوالو د جبري ایستلو پلان لغوه کړي.
دغه سازمان زیاته کړې، چې دا کمپاین یې پاکستان کې په ناقانونه توګه د ایستلو له ګواښ سره د مخ شویو افغانانو د غږ پورته کولو، د دوی د بشري حقونو د دفاع او په بېړنۍ توګه د جبري ستنولو بهیر درولو لپاره د عامه پوهاوي د لوړولو په موخه پيل کړی دی.
د بښنې نړیوال سازمان د جنوبي آسیا مرستیال بابو رام پانت زیاته کړې، هغه افغانان چې د طالبانو له واکمنۍ وروسته پاکستان ته تللي، په ځانګړي ډول ښځې، خبریالان، د بشري حقونو فعالان، هنرمندان او پخواني چارواکي له جدي خطر سره مخ دي او ټینګار کوي چې پاکستان باید د دوی جبري اخراج بند کړي.
پاکستان د تېرې مارچ میاشتې ۳۱ مه په خپله خوښه ACC کارت لرونکو افغانانو ته وخت ورکړ، چې له پاکستان ووځي، چې د یاد مودې له پوره کېدو سره سم پاکستان د افغان کډوالو د نیولو او اخراج پراخ عملیات پیل کړي دي.
تازه پاکستانۍ رسنۍ وایي په راولپنډۍ کې د افغان کارت لرونکو کډوالو نیول پيل شوي او نږدې ۵۰ نیولي کسان یې د کډوالو کمپ ته لېږدولي دي.
سرچینو ویلي چې د دې کسانو له نیول کېدو وروسته یې کورنۍ هم له کورونو ویستل شوي او د کډوالو کمپ ته وړل شوې دي.
د معلوماتو له مخې دا مهال په پاکستان کې ۸۰۰ زره هغه افغانان اوسېږي، چې افغان سټیزن کارت لري، خو د پاکستان حکومت وایي چې اوس دا کډوال غیرقانوني ګڼل کېږي.