تاند (چهارشنبه، د وري/ حمل ۱۳ مه)د اروپايي اتحادیې د احصایې مرکز «یوراستات» د معلوماتو له مخې، په ۲۰۲۳ میلادي کال کې له بیلابیلو هیوادونو شاوخوا ۴.۳ میلیون کسان اروپايي اتحادیې ته کډه شوي دي.

البته، په دې شمېره کې هغه اوکرایني کډوال او پناه‌غوښتونکي شامل نه دي چې د دې اتحادیې د ځینو غړو هېوادونو لنډمهاله پناه ورکړې ده.

په ټوله کې، د ۲۰۲۲ کال په پرتله، اروپايي اتحادیې ته د کډوالو شمېر ۱۷.۹ سلنه کم شوی دی.

په ۲۰۲۳ میلادي کال کې، ۱.۵ میلیونه کسان د اتحادیې د غړو هېوادونو ترمنځ کډوال شوي دي. د یوراستات د شمېرو له مخې، په ۲۰۲۳ کال کې، د اروپايي اتحادیې په هر ۱۰۰۰ اوسېدونکو کې ۱۰ کسان له اتحادیې څخه بهر راغلي کډوال وو.

مالټا د خپلو اوسېدونکو د شمېر په پرتله د مهاجرت تر ټولو لوړ نرخ ثبت کړی، چې په هرو ۱۰۰۰ کسانو کې ۷۶ مهاجر (د اروپايي اتحادیې له غړو او له بهرنیو هېوادونو څخه) ورغلي دي. له مالټا وروسته، قبرس (په هر ۱۰۰۰ اوسېدونکو ۴۳) او لوکزامبورګ (په هر ۱۰۰۰ اوسېدونکو کې ۴۰ مهاجر) په دوهم او درېیم مقام کې راغلي دي.

برعکس، سلواکیا په هر ۱۰۰۰ اوسېدونکو کې یو مهاجر، او وروسته فرانسه (هر ۱۰۰۰ اوسېدونکو کې ۶ مهاجر) او ایټالیا (په هر ۱۰۰۰ اوسېدونکو کې ۷ مهاجر) تر ټولو کم مهاجرت ثبت کړی دی.

لوکزامبورګ د اروپايي اتحادیې له نورو غړو هېوادونو څخه د کډوالو تر ټولو لوړ شمېر لري، په داسې حال کې چې چک جمهوریت د اروپايي اتحادیې د نورو غړو هېوادونو له لوري تر ټولو کم مهاجر منلي دي.

تقریباً د اروپايي اتحادیې په ټولو هېوادونو کې، د اروپايي اتحادیې له بهرنیو هېوادونو څخه د راغلو کډوالو شمېر له هغو کسانو ډېر و، چې د اتحادیې له غړو هېوادونو راغلي وو.

په دې برخه کې لوکزامبورګ (چې ۸۵.۷ سلنه مهاجر د اروپايي اتحادیې له غړو هېوادونو ورته راغلي) او سلواکیا (۵۷.۵ سلنه)، استثنا دي.

له اروپايي اتحادیې بهر د کډوالو تر ټولو لوړه سلنه چک جمهوریت (۸۹.۲ سلنه)، لیتوانیا (۸۸.۹ سلنه) او ایرلند (۸۷.۲ سلنه) ثبت کړې ده.