تاند (دوشنبه، د وري/ حمل ۱۱ مه) د سویس د بشري مرستو د واحد (SHA) یوه ټیم په کابل ښار کې د سویس بشري دفتر پرانیستی دی. دا سیمهییز حضور به د اړو افغانانو لپاره د هدفمنې مرستې اسانتیاوې برابرې کړي.
یاد بشري دفتر د سویس د همکارۍ د پخواني دفتر په ودانۍ کې فعالیت کوي، چې د ۲۰۲۱ کال د اګسټ په میاشت کې د طالبانو له واکمنېدو وروسته تړل شوی و.
په افغانستان کې بشري بحران د نړۍ له سختو بحرانونو څخه شمېرل کېږي. د طالبانو له واک ته رسېدو له څلورو کلونو ډېر وخت تېر شوی، خو لا هم د افغانستان د وګړو نیمایي برخه بشري مرستو ته اړتیا لري.
د سویس د بهرنیو چارو وزارت د دوشنبې په ورځ په یوه خبرپاڼه کې ویلي، د دې لپاره چې سیمهییزې مرستې اغېزناکې وي، اړینه ده چې د وضعیت دقیق درک ولرو او له سیمهییزو همکارو بنسټونو سره نژدې کار وکړو.
له همدې امله، د SDC ادارې د مارچ میاشتې په نیمایي کې یو بشري دفتر پرانیست. دا مهال، د SHA څلور کارپوهان او لس تنه سیمهییز کارکوونکي د همکارۍ د پخواني دفتر په ودانۍ کې کار کوي. دا سیمهییز حضور د دې زمینه برابروي چې د SDC پروګرامونه د وضعیت له مخې تنظیم کړي او له سیمهییزو او نړیوالو همکارو بنسټونو سره یې مدیریت اغېزمن کړي. دا هڅې به د افغانانو لپاره مستقیمې او ګټورې مرستې رامنځته کړي.
د سویس د مرستو لومړیتوبونه
د سویس د مرستو تمرکز په بشري مرستو، د افغان مدني ټولنې، په ځانګړي ډول د ښځو او نجونو په ملاتړ، او د کلیوالي سیمو د خوړو په خوندیتوب باندې دی. د SDC اداره خپلې پروژې د نړیوالو او سیمهییزو نادولتي بنسټونو، د سره صلیب نړیوالې کمېټې (ICRC)، د ملګرو ملتونو ادارو، او نړیوال بانک سره په همغږۍ عملي کوي. د دې پروګرامونو لپاره کلنی بودیجه، چې عملیاتي او د کارکوونکو لګښتونه هم پکې شامل دي، ۲۵ میلیونه سویسي فرانکه ده.
په څلورو هېوادونو کې بشري دفترونه
د SDC اداره په هغو هېوادونو کې بشري دفترونه لري، چې اوږدمهاله او سخت بشري بحرانونه لري. د SHA کارکوونکي د دې دفترونو له لارې د بشري پروګرامونو ملاتړ او عملي کولو ته دوام ورکوي. د کابل تر څنګ، د SDC ادارې بشري دفترونه په لاندې هېوادونو کې هم فعالیت کوي:
- د مرکزي افریقا جمهوریت (بنګي)
- هایټي (پورټاوپرنس)
- سوریه (دمشق)
د SDC اداره د ۲۰۲۵-۲۸ کلونو د نړیوالې همکارۍ د ستراتیژۍ له مخې، په هغو هېوادونو کې د همکارۍ دفترونه لري، چې د سویس لپاره د پراختیایي همکاریو لومړیتوب لري. د دې دفترونو د کار تمرکز پر اوږدمهاله پراختیایي پروګرامونو دی، چې د سویس د پراختیايي همکارۍ اداره یې همږغي په غاړه لري.