تاند【شنبه د حمل ـ وري ۹مه】د طالبانو د بهرنیو چارو وزارت ویاند عبدالقهار بلخي د امریکا د ولسمشر ډونالډ ټرمپ وروستیو څرګندونو په غبرګون کې ویلي،چې په افغانستان کې د امریکایي ځواکونو پاتې شوي نظامي تجهیزات د طالبانو ملکیت دی.
عبدالقهار بلخي په یوه مرکه کې زیاته کړې، چې دغه وسلې به امریکا ته هېڅ کله ونه سپارل شي.
دا په داسې حال کې ده چې ډونالډ ټرمپ څو ورځې وړاندې یو ځل بیا پر جو بایډن له دې امله سختې نیوکې وکړې، چې په افغانستان کې یې د ملیاردونو ډالرو په ارزښت نظامي تجهیزات پریښي دي.
ډونالډ ټرمپ د تېر په څېر په ځلونو ټینګار کړی، چې په افغانستان کې له امریکايي ځواکونو پاتې وسلې به له طالبانو بېرته واخلي.
د امریکايي ځواکونو له وتلو او د جمهوري نظام تر سقوط وروسته ګڼ شمېر وسلې د طالبانو لاسته ولوېدې، چې اوس یې په پوځي مانورونو کې نندارې ته وړاندې کوي، هغه حالت چې ټرمپ ځوروي.