تاند (شنبه، د وري/ حمل ۹ مه) د امریکا مرستیال ولسمشر جې. ډي. وانس د جمعې په ورځ طالبان “د نړۍ تر ټولو په بدو ترهګرو ډلو” کې وشمېرل او د بایډن اداره یې تورنه کړه چې له افغانستانه د ګډوډ وتلو پر مهال یې طالبانو ته د ملیاردونو ډالرو پوځي وسایل پرېښودل.
وانس، چې د امریکا د فضایي ځواکونو د عملیاتو مرکز د لیدو لپاره ګرینلنډ ته تللی و، د ۲۰۲۱ کال د وتلو پروسه “ناورین ته ورته تېروتنه” وبلله، چې د ۱۳ امریکایي سرتېرو د وژل کېدو او د شاوخوا ۸۰ میلیاردو ډالرو پوځي تجهیزاتو د بایللو سبب شوه.
هغه وویل:
«زما په یاد دي چې شاوخوا څلور کاله مخکې، د امریکا پوځي مشرتابه یوه تراژیکه تېروتنه وکړه، چې ۱۳ بېګناه امریکایان یې ووژل او شاوخوا ۸۰ میلیارد ډالره پوځي وسایل یې د نړۍ یوې تر ټولو بدو تروریستي ډلې ته وسپار..»
وانس امریکایي رسنۍ هم تورنې کړې، چې د بایډن د ادارې د وتلو پر مهال یې د دوی د کړنو د پټولو هڅه کړې ده.
دا لومړی ځل دی چې د ټرمپ ادارې یو جګپوړی چارواکی په تېرو څه باندې دوو میاشتو کې، چې واک یې ترلاسه کړی دی، طالبان په ښکاره “ترهګره ډله” بولي.
ولسمشر ډونالډ ټرمپ، تل له افغانستان د وتلو پر پرېکړې نیوکه کړې، او د هغو پوځي تجهیزاتو بېرته ترلاسه کولو موضوع ته یې پام اړولی، چې امریکا په افغانستان کې پرېښي دي.
خو له دې سره سره په وروستیو کې د امریکا او طالبانو په اړیکو کې د ښه والي لور ته ځینې ګامونه اخیستل شوي دي. طالبانو یو امریکايي بندي خوشي کړی او امریکا د طالبانو د کورنیو چارو وزیر، سراجالدین حقاني له تور لیسته وایست او د هغه پر سر لس میلیون ډالري جایزه یې لغوه کړه.
څرګنده نه ده چې د ښاغلي ویانس د نیوکې انګېزه په رښتیا هم د طالبانو په وړاندې د امریکا د نوي حکومت اصلي دریځ دی او که دا نیوکه له هغه مخالفت سره تړاو لري چې د ټرمپ اداره یې له بایډن او د هغه له حکومت سره لري.