تاند【دوشنبه د کب ـ حوت ۲۰مه】ننګرهار کې د طالبانو د حکومت د اطلاعاتو کلتور رئیس قاري احسان الله ساجد وایي، د تورخم دوازې د خلاصون په اړه د افغان او پاکستاني سوداګرو ترمنځ ابتدایي خبرې شوي او ښایي دغه دروازه د ټرانزیټي موټرو پر مخ خلاصه شي.
ساجد زیاته کړې، چې سوداګرو د افغانستان او پاکستان حکومتونو ته تر لوی اختر پورې د اوربند وړاندیز هم ورکړی دی.
د تورخم دروازه د روانې میاشتې په درېیمه نېټه د پاکستان له لوري د هر ډول تګ راتګ پرمخ وتړل شوه.
پاکستان د دروازې د تړل کېدو لامل د افغان ځواکونو له لوري د ډیورنډ فرضي کرښې ته څېرمه دې غاړي ته د پوځي تاسیساتو جوړول یاد کړي.
د یادونې ده، چې په تېرو شل ورځو کې د دواړو لورو ترمنځ وسله والې نښتې هم وشوې چې له امله یې مالي او ځاني زیانونه واوښتل.
بل لورته د ترکیې اناتولي خبري اژانس بیا د یوه پاکستاني چارواکي له قوله ویلي، چې په تورخم کې په دوه ورځني اوربند هوکړه شوې ده.
سرچینې ویلي چې، دا هوکړه د دواړه غاړه قومي مشرانو له جرګې وروسته شوې ده.
پرون【یکشنبه د کب ـ حوت ۱۹مه】د افغانستان – پاکستان د سوداګرۍ ګډې خونې هم ویلي وو چې، د تورخم لارې د پرانیستې په موخه د افغانستان او پاکستان د سوداګرۍ خونو او سوداګرو ترمنځ جرګه کېږي.
دغې خونې د دې جرګې بله موخه د ډېورنډ پر فرضي کرښه اوربند یاد کړی وو.
سرچینې داهم ویلي وو چې، په دغه جرګه کې به د دواړو خواو دولتي استازي ګډون ونه کړي.
شاوخوا ۱۸ ورځو په تېرېدو لاهم د تورخم دروازه تړلې ده.