تاند【دوشنبه د کب ـ حوت ۲۰مه】د طالبانو د کانونو او پټرولیم وزارت په یوه خبرپاڼه کې ویلي چې؛ د یکشنبې پر ورځ د دې وزارت سرپرست هدایت الله بدري په کابل کې د قرغیزستان د کانونو وزارت له پخواني مرستیال الماس بیک تومانوف، د آذربایجان د کانونو وزارت پخواني مرستیال آذر شکوروف او مل پلاوي سره وکتل.
د دواړو هېوادونو پخوانیو مرستیالانو د وزارت د مشرتابه له مېلمه پالنې څخه د مننې ترڅنګ په افغانستان کې د پانګونې فرصتونه مناسب وګڼل.
آذربایجان او قرغیزستان د کانونو په ځانګړي توګه د تېلو او ګازو په برخه کې د پانګونې په موخه له افغان لوري څخه د همکارۍ غوښتنه وکړه او همدارنګه یې د یو معیاري لابراتوار د جوړولو ژمنه وکړه.
د طالبانو د کانونو او پټرولیم وزارت سرپرست هغوی ته د ښه راغلاست تر څنګ ویلي چې، دوی د بهرنیو پانګوالو د جلبولو او د هغوی لپاره د لا زیاتو اسانتیاوو د رامنځته کولو لپاره کار کوي او د کانونو له قوانینو سره سم به په دې برخه کې هر ډول اړینه همکاري وکړي.