تاند【شنبه د کب ـ حوت ۱۸مه】افغانستان کې د ملګرو ملتونو د ښځو څانګه وایي، پر افغان ښځو پانګونه د افغانستان پر راتلونکي پانګونه ده.
دغه سازمان اتم د مارچ د ښځو نړیوالې ورځې په مناسبت یوه پېغام کې زیاته کړې چې، افغان ښځې د ګڼو ننګونو سره سره د خپلو حقونو لپاره مبارزه کوي.
په پېغام کې د ملګرو ملتونو د ښځو څانګې ویلي ” موږ باید خپله خواخوږي په عمل بدله کړو.”
دغه څرګندونې داسې مهال کېږي چې، نن د مارچ اتمه د ښځو نړیواله ورځ ده او افغان ښځې له سختو بندیزونو سره مخې دي.
بل لورته بیا د ملګرو ملتونو کې د قطر دایمي استازې، علیا احمد بن سیف آل ثاني د دغه سازمان په مرکز کې د یوناما له مشرې روزا اوتونبایوا سره کتلي دي.
د قطر بهرنیو چارو وزارت په یوه خبرپاڼه کې ویلي، دواړو خواو افغانستان کې پر روان وضعیت او سولې او ثبات لپاره پر روانو هڅو خبرې کړې دي.