تاند【جمعه د کب ـ حوت ۱۷مه】د هرات مطبوعاتي دفتر په یوه خبرپاڼه کې د خواف – هرات اوسپنې پټلۍ د څلورمې قطعې د دوهمې برخې جوړولو قرارداد د لاسلیک خبر ورکړی دی.
د یادې لار قرارداد د روان لمریزکال په پیل کې د ۵۳ ملیونه ډالرو په ارزښت د ګاما ګروپ له شرکت سره لاسلیک شو.
د خبرپاڼې له مخې قراردادي شرکت ویلي چې، د خواف ـ هرات د څلورمې قطعې کارونه به په ۶ میاشتو کې بشپړې شي.
د معلوماتو له مخې د خواف ـ هرات رېل پټلۍ چې افغانستان او ايران سره نښلوي،د جوړېدو چارې يې په څلورو برخو وېشل شوې دي.
درې برخې کار يې بشپړ او د يوې برخې د جوړېدو چارې يې تر کار لاندې دي.
د خواف-هرات اوسپنې پټلۍ د افغانستان او ایران ترمنځ یوه مهمه اقتصادي پروژه ده، چې د دواړو هېوادونو ترمنځ د سوداګرۍ او ترانزیت په برخه کې د پام وړ اهمیت لري.
اقتصادپوهان وایي، د دې پټلۍ له لارې، توکي په اسانۍ سره لیږدول کېږي، چې دا د سوداګرۍ په زیاتوالي او د ترانسپورټ په لګښتونو کې په کموالي کې مرسته کوي.
دوی زیاتوي، چې په ټوله کې، د خواف-هرات اوسپنې پټلۍ د افغانستان او ایران ترمنځ د اقتصادي اړیکو په پیاوړتیا کې مهم رول لري او د سیمې په اقتصادي پرمختګ کې به لا زیات اغېز ولري.
یو وخت تاند د اورګاډي د لارې لپاره د «رېللار» اصطلاح کاروله، هغه هم اسانه ده او هم لنډه. د اوسپنې پټلۍ اصطلاح په غوږونو بده لګیږي. دغه راز، تاند د اېکسپاڼه اصطلاح را واېستله خو اوس یې نه کاروي. دا یې دویم عیب. درېیم عیب چې تاند یې ښيي هغه د S. Sapai انګریزي نوم دی. لطفا دا په پښتو واړوئ ځکه دا د پښتو سایټ دی او انګریزي په کې ښه نه لګیږي. مننه