تاند【سه شنبه د سلواغې ـ دلوې ۳۰مه】پاکستاني امنيتي سرچينو رسنیو ته ویلي چې، پرون دوشنبه د ډېره اسماعيل خان د کلاچي ولسوالۍ په بای پاس سړک چاودنې دوه پوځيان وژلي دي.
دغو امنيتي سرچينو زياته کړې، چاودنه د سړک په غاړه د اېښودلي بم له امله شوې، چې پکې د پاکستاني پوځیانو وسايط هم په نښه شوي دي.
د دغې چاودنې مسووليت د تحريک طالبان پاکستان (ټيټيپي) ډلې په غاړه اخېستی دی.
دا په داسې حال کې ده، چې تر دې یوه ورځ وړاندې په شمالي وزيرستان کې په پاکستاني پوځيانو د برید په پايله کې د يوه افسر په ګډون څلور پاکستاني عسکر وژل شوي وو.
پاکستان اوسمهال له سختو امنیتي اندېښنو سره مخ دی او هره ورځ پکې د چاودنو او بریدونه خبرونه خپرېږي.