تاند (شنبه، د سلواغې/ دلوې ۲۰ مه) د طالبانو د دفاع وزارت د امریکا متحدوایالتونو ته د افغانستان د پخوانۍ ملي اردو د هوايي ځواک د څرخکو انتقال “د منلو وړ نه بولي.”
د طالبانو د دفاع وزارت د شنبې په ورځ په یوه خبرپاڼه کې د امریکا له متحدوایالتونو وغوښتل چې افغانستان ته د دې هیليکوپټرونو د بېرته ستنولو پر وړاندې خنډونه پېښ نه کړي.
د څرخکو انتقال
د چهارشنبې په ورځ، د سلواغې ۱۷مه، د ازبکستان رسنیو راپور ورکړ چې د افغانستان د پخوانۍ ملي اردو اووه “بلکهاوک” هیليکوپټرونه، چې په ۱۴۰۰ لمریز کال کې ازبکستان ته وړل شوي وو، امریکا ته انتقال شوي دي.
د راپورونو له مخې، د امریکا دفاع وزارت دا هیليکوپټرونه د کارونې لپاره مناسب ګڼلي او د ازبکستان په مرسته یې امریکا ته لېږدولي دي.
ازبکستان وايي چې په دې هېواد کې د افغانستان د پخواني پوځ ۲۲ جنګي الوتکې او ۲۴ هیليکوپټرونه شته، چې له ډلې یې اووه څرخکې امریکا ته لېږدول شوي دي.
د طالبانو غبرګون
د طالبانو د دفاع وزارت د ازبکستان او امریکا په دې کړنه اندېښنه څرګنده کړه او ویې ویل چې «دا هیليکوپټرونه د افغانستان ملکیت دي، چې د پخواني حکومت د پرزېدو پر مهال ازبکستان ته تښتول شوي دي.»
دفاع وزارت ازبکستان ته په خطاب کې ویلي:
“ګاونډي هېوادونه باید د افغانانو حقونو ته درناوی وکړي” او دوی د دې هیليکوپټرونو پر سمدستي بېرته راستنولو ټینګار کوي.
د امریکا متحدو ایالتونو ته پیغام
د طالبانو د دفاع وزارت امریکا ته په خطاب کې ویلي:
“موږ له امریکا غواړو چې د دې هیليکوپټرونو د بېرته راستنولو پر وړاندې خنډ جوړ نه کړي او هغه بېرته افغانانو ته وسپاري.”
د امریکا د سفیر دریځ
جاناتان هنیک، چې د امریکا سفیر په ازبکستان کې دی، د سنبلې په میاشت کې ویلي وو:
“دا وسایل هېڅکله د افغانانو نه وو، بلکې د امریکا ملکیت وو. د افغانستان پوځ ترې استفاده کوله، خو موږ تل د دې وسایلو مالک وو.”