تاند (شنبه، د سلواغې/ دلوې ۲۱ مه) د امریکا دفاع وزیر پیت هګست وايي چې له افغانستانه د امریکا له ګډوډ وتلو څخه د حساب‌اخیستنې لپاره به دا موضوع وڅېړي.

هغه د پنتاګون له کارکوونکو سره په کتنه کې وویل:
«موږ به د افغانستان د وتلو موضوع وڅېړو، ترڅو معلومه کړو چې څه ډول تېروتنې شوي او ولې د هغو لپاره هېڅ حساب نه دی اخیستل شوی.»

د امریکا نړیوال حیثیت ته زیان

پیت هګست، په افغانستان کې ناکامه جګړه، پر اوکراین د روسیې یرغل، او پر اسراییل د حماس ناڅاپي برید، هغه پېښې وبللې چې د امریکا پر ځواکمنتیا یې د نړۍ باور کمزوری کړی دی.

هغه ژمنه وکړه چې د افغانستان د جګړې په اړه به، چې په ۲۰۲۱ کال کې د امریکا له ګډوډ وتلو سره پای ته ورسېده او د واشنګټن له ملاتړه برخمن حکومت په کابل کې ژر نسکور شو، حساب‌اخیستل کېږي.

د پنتاګون د وزیر ژمنې

د جمعې په ورځ (د سلواغې ۱۹مه)، پیت هګست د پنتاګون له کارکوونکو سره د کتنې په ترڅ کې وویل:
«موږ به دا وڅېړو چې په افغانستان کې څه وشول او مسوولان به ځواب ویونکي کړو، نه د انتقام لپاره، بلکې د دې لپاره چې پوه شو، تېروتنې څه وې او ولې هېڅ حساب وا نه‌خیستل شو؟»

د ټرمپ دریځ

د امریکا پخواني ولسمشر ډونالډ ټرمپ مخکې ویلي و چې له هغو پوځي مسوولانو څخه به د استعفا غوښتنه وکړي چې له افغانستانه د ځواکونو ایستل ‌یې مدیریت کړي وو.

هغه وویل:
«زه د دوی د سمدستي استعفا غوښتنه کوم.»

ټرمپ څو ځله د امریکا د ناکام وتلو پړه پر جو بایډن او د هغه پر مرستیالې کامالا هریس ور اچولې.

هغه پر بایډن نیوکه کړې چې د افغانستان له ګډوډ وتلو وروسته‌ یې هیڅوک نه مسوول وګاڼه او نه‌ یې له دندې لرې کړ.

ټرمپ: “غمیز شاتګ”

ټرمپ تل د افغانستان وتل “ناورین او غمیز شاتګ” بللی او ویلي یې دي چې دا د امریکا په تاریخ کې «تر ټولو سپکوونکې پېښه» وه.

بلینکن: جګړه باید پای ته رسېدلې وای

د بایډن د حکومت د بهرنیو چارو وزیر، انتوني بلینکن، ویلي چې که امریکا له افغانستانه نه وای وتلې، طالبانو به پر امریکایي سرتېرو بریدونه کړي وای.

بلینکن وویل بایډن باید د جګړې د دوام یا پای ته رسولو ترمنځ انتخاب کړی وای.

د ټرمپ تازه څرګندونې

ولسمشر ډونالډ ټرمپ وايي، دا د ولسمشر جو بایډن د ادارې ساده توب و چې په افغانستان کې یې د میلیاردونو ډالرو وسلې پریښودې.

ښاغلي ټرمپ پرون (د سلواغې ۱۹مه) په سپینه ماڼۍ کې د جاپان له لومړي وزیر سره په ګډه خبري غونډه کې وویل چې په افغانستان کې د دومره ډېرو پوځي تجهیزاتو د پریښودو لپاره هیڅ دلیل نشته.

ټرمپ څو ځلي په افغانستان کې د امریکا د وسلو پر پاتې کېدو نیوکه کړې ده.