تاند【چهارشنبه د سلواغې ـ دلوې ۱۷مه】د خېبر پښتونخوا قبایلي برخې، جنوبي وزیرستان کې ناپېژانده وسله والو ۳ پاکستاني پولیس تښتولي دي.
پاکستاني رسنۍ وایي یاد پولیس وسله والو د هغوي له کورونو تښتولي دي.
پولیسو هم د دې پېښې پخلی کړی او د دوی د خلاصون د هڅو له پیل یې خبر ورکړی دی.
سرچینې وایي د بر جنوبي وزیرستان د پولیسو مشر ارشد خان رسنیو ته ویلي، چې تښتول شوي پولیس د جنوبي وزیرستان د لدهې د زنګړه کلي څخه وسله والو تښتولي دي.
تر دې پېښې وړاندې د تېرې جنورۍ میاشتې په پای کې هم په شمالي وزیرستان کې د دوو جلا پېښو پرمهال د ایف سي ځواک د یو سرتېری په ګډون شپږ کسان ناپېژانده وسله والو تښتولي وو او دغه راز یې دوه د اوبو ټانکرې هم له ځانه سره وړې وې.
پاکستان له بد امنیتي وضعیت سره مخ ده او هره ورځ ترې د وسله والو بریدونو، چاودنو او تښتونو خبرونه خپرېږي.