تاند (دوشنبه، د دلوې/ سلواغې ۱۶ مه) اطلاعاتو او کلتور وزارت اعلان کړی چې د رادیو بیګم خپرونې د څو ځل سرغړونو له امله ځنډول شوي دي.
د وزارت د بیان له مخې، رادیو بیګم نه یوازې د خپرونو له اصولو او مقرراتو څخه سرغړونه کړې، بلکې له هېواد څخه بهر د تلویزیوني چینلونو لپاره یې هم محتوا او پروګرامونه خپرول.
د یادې اعلامیې پر بنسټ، د دغو سرغړونو او د خپرونو د جواز د ناسمې استفادې له امله، د بیګم رادیو خپرونې ځنډول شوې دي، او تر هغه به بېرته نه فعالېږي، ترڅو یې بشپړ ارزونه ترسره شي.
له بلې خوا رادیو بیگم په یوه بیان کې ویلي: “د استخباراتو د عمومي ریاست (GDI) افسرانو، چې د اطلاعاتو او کلتور وزارت استازو یې ملتیا کوله، نن د کابل په ښار کې د بیگم رادیو پر دفتر چاپه ووهله.”
دغه رادیو ادعا کړې چې طالب چارواکو د دفتر د تلاشي پر مهال کارکوونکي منع کړي، کمپیوټرونه، هارډ ډرایفونه او تلیفونونه ضبط کړي، او دوه نارینه کارکوونکي یې نیولي، چې د ادارې د لوړپوړو غړو له ډلې څخه نه دي.
د طالبانو د اطلاعاتو او کلتور وزارت دا پرېکړه وروسته له هغه اعلان کړه چې د بیګم اصلي چلوونکو له نړیوالو رسنیو سره په څو مرکو کې له فرانسې څخه د تلویزوني خپرونو د پیلولو د اعلان ترڅنګ وویل چې په افغانستان کې هم د بیګم په نوم راډیو لري چې لا هم فعاله ده.