تاند【دوشنبه د سلواغې ـ دلوې ۱۵مه】د ملګرو ملتونو د بشري مرستو د همغږۍ دفتر (اوچا) ویلي، دا درېیم کال دی چې افغان نجونې له شپږم ټولګي پورته له زده کړو بې برخې دي.
اوچا زیاته کړې، چې په تېرو درېیو کلونو کې ۱.۵ میلیون افغان نجونې د زده کړو له حقه محرومې دي.
سرچینې غوښتنه کړې، چې د زده کړو له حقونو دغه سرغړونه باید نوره پاې ته ورسیږي.
له تېرو درېیو کلونو راهیسې په کورني او نړیواله کچه افغانستان کې د نجونو د حقونو د ورکړې غوښتنه کېږي، خو طالبان منفي ځواب ورکوي.
په داسې حال کې، چې هېڅ راز قانوني خنډ نه لیدل کېږي، خو بیا هم د طالبانو حکومت د مناسب چاپیریال نشتون په خپلو خبرو کې د نجونو د زده کړو د منعې لپاره کاروي.
وبه لیدل شي، چې طالبان څومره د ښځو او نجونو حقونو ته ژمن او کله د افغان نجونو د زده کړو حق ورکوي.