تاند (سې شنبه، د سلواغې/ دلوې ۳ مه) د متحده عربي اماراتو دولتمشر شیخ محمد نن (سې شنبې) په ورځ په ابوظبۍ کې په خپله ماڼۍ کې د افغانستان له کورنیو چارو وزیر سراج الدین حقاني سره وکتل.
د متحده عربي اماراتو د دولتي خبري اژانس وام د راپور له مخې، په دې کتنه کې دواړو مشرانو د افغانستان وروستي پرمختګونه وڅېړل او د دوه اړخیزې همکارۍ د پیاوړتیا لارې چارې یې وپلټلې.
هغوی همداراز د افغانستان د بیا رغونې او ثبات د ملاتړ هڅې وڅېړلې ترڅو د افغان ولس لپاره پرمختګ او سوکالي رامنځته شي. ښاغلي حقاني د افغانانو لپاره د اماراتو د بشري مرستو ستاینه وکړه.
په راپور کې نه دي ویل شوي چې حقاني کله متحده عربي اماراتو ته رسیدلی او یا یې د دې سفر هدف څه دی.
خو نوموړي په داسي ورځ د اماراتو له مشر سره وکتل چې طالبانو د قطر په منځګړیتوب د یو امریکایي زنداني د خوشې کولو په بدل کې دوه امریکایان امریکایي خوشي کړل.
سراج الدین حقاني تر دې وړاندې د ۲۰۲۴ په جون میاشت کې هم متحده عربي اماراتو ته تللی و او د دغه هیواد د دولتمشر په شمول یې له بیلابیلو چارواکو سره کتلي و.