تاند【چهارشنبه د مرغومي ـ جدي ۲۶مه】د ملګرو ملتونو د بشري مرستو د همغږۍ اداره (اوچا) د ۲۰۲۵ کال په راپور کې ویلي، چې را روان کال کې به ۱۴.۳ میلیونه افغانان بېړنیو روغتیایي مرستو ته اړتیا ولري.
د راپور په بنسټ، یواځې ۹.۳ میلیونه تنو ته به مرستې ورسېږي.
اوچا دغه راز زیاته کړې، چې په اړمنو کسانو کې تر ۲۳ زیات ښځې ، ۵۳ سلنه ماشومان او کابو ۱۰ سلنه معلولیت لرونکي کسان شامل دي.
یاد سازمان زیاته کړې، چې د دې مرستو رسولو په پار له ۲۷۹ میلیون ډالرو څخه زیاتې مرستې ته اړتیا ده.
دا راپور داسې مهال خپرېږي، چې سږ ژمي کې هم ډېری افغانان له موسمي ناروغیو کړېږي او د درملنې لپاره په کافي اندازه څه په لاس کې نه لري.
په اړمنو کسانو کې ډېری ماشومان د موسمي ناروغیو قربانیان دي.
اړمن افغانان تمه لري، چې طالبان به د دوی لاسنیو کوي او پر وخت به دوی ته لازمې مرستې رسوي.