تاند (دوشنبه، د مرغومي/ جدي ۲۲ مه) د احصایې او معلوماتو اداره وايي چې د الیکترونیکي تذکرو د وېش له پيل څخه تر اوسه پورې تر ۱۵ میلیونو زیاتو کسانو ته برېښنايي تذکرې وېشل شوې دي.
د الیکترونیکي تذکرو وېش په چمهوري حکومت کې له اوږدو ناندریو وروسته پیل شو او ورځ په ورځ یې توزیع په پراخېدو وه خو د طالبانو له واک ته رسیدو سره دا بهیر ټکنی شو مګر طالبانو په وروستیو کلونو کې د دغو تذکرو وېش بیرته چټک کړ.
ویل شوي چې نژدې ۹ میلیونه برېښنايي تذکرې د طالبانو د حکومت له رامنځته کېدو په وروسته څه باندې درو کلونو کې وېشل شوې دي.
د ورکړل شویو شمېرو له مخې، تر اوسه پورې له ۹ میلیونه او ۶۷ زرو څخه زیاتو نارینهوو او له ۵ میلیونه او ۹۵۲ زرو څخه زیاتو ښځو ته برېښنايي تذکرې وېشل شوې دي.
عموماً هغه خلک الیکترونیکي تذکرې اخلي چې له هیواده د وتلو نیت لري خو که د تذکرې د لرلو شرط په ډېرو برخو کې کېښودل شي، ښايي ټول خلک د دغو تذکرو اخیستلو ته مکلف شي.