تاند (جمعه، د مرغومي/ جدي ۲۱ مه) د بلوچستان د ازادۍ د پوځ (بلوچ لیبریشن آرمي) وايي چې جنګیالیو یې په اوو جلا عملیاتو کې د پاکستاني پوځ، د مرستیال کمېشنر موټر، د مرستیال کمېشنر دفتر او د پولیسو سټېشن په نښه کړل.
دغه عملیات په کولپور، زهري، زامران، کلات او حب کې ترسره شول. جنګیالیو د مرکزي لویې لارې د بندولو ترڅنګ د پوځ یوه پوسته نیولې، د هغوی وسلې یې ضبط کړي او د یوه شرکت فابریکه یې ویجاړه کړې ده. دوی شرکت په استثمارګرو پورې تړلی بللی دی. له دې ډول خبرې د دوی منظور عموماً پوځ یا پنجابیان وي.
د بلوچستان د ازادۍ پوځ همداراز ادعا کړې چې جنګیالیو یې تېره شپه په کولپور کې لویه لاره بنده کړه. دې بندیز د ماښام له اتو بجو څخه د شپې تر یوولسو بجو پورې دوام وکړ. په دې لړ کې د دوی جنګیالیو په لویه لار د موټرو تلاشي واخیسته.
په ورته وخت کې، د جنګیالیو یوې بلې ډلې د لویې لارې د لیویز (ملېشه ځواک) پوسته نیولې او هلته څلور موجود کسان یې نیولي دي. هغوی یې بېرته د ضمانت په بدل کې خوشي کړل، ځکه چې هغوی بلوڅ وو، خو د هغوی درې کلاشنکوفونه ورڅخه ضبط کړل.
د بلوچستان د ازادۍ پوځ ویندوی جنید بلوچ رسنیو ته په استولې خبرپاڼه کې دغه راز لیکلي چې د جنګیالیو درېیمې ډلې د استثماري ساختماني شرکت ټول وسایل ویجاړ کړل او اور یې ورواچاوه.
په خبرپاڼه کې وړاندې راغلي چې نن مازیګر د بلوچستان د ازادۍ پوځ جنګیالیو د زهري په چشمې سیمه کې د مرستیال کمېشنر موټر له لیري په کنټرولېدونکي بمي برید والوزاوه.
خبرپاڼه وايي، د مرستیال کمېشنر موټر هغه مهال په نښه شو چې هغه د خضدار له ښار څخه له QRF سره یو ځای د پوستو د لیدو لپاره راغلی و.
د بلوچستان د ازادۍ پوځ جنګیالیو د جنورۍ پر ۸مه په زامران سیمه کې د کنټګان په سیمه کې د پاکستان د پوځ په پلي پرسونل د ماین برید وکړ، چې په پایله کې یې یو عسکر ځای پر ځای ووژل شو.
په بل برید کې، د بلوچستان د ازادۍ پوځ جنګیالیو د کلات په ښار کې د سې شنبې په شپه د ډپټي کمېشنر دفتر په لاسي بم په نښه کړ چې په نتیجه کې یې د دفتر ودانۍ زیانمنه شوه.
د بلوچستان د ازادۍ پوځ جنګیالیو تېره شپه د حب ښار د پولیسو سټېشن په اصلي دروازه کې د پوستې پر پرسونل د لاسي بم برید وکړ.
د پاکستان پوځ او نورو چارواکو د بلوچستان د ازادۍ پوځ د ادعاوو په اړه څه نه دي ویلي. په بلوچستان کې ازادې رسنۍ په سخته سانسور کېږي او خپلواکې سرچینې په دغه ایالت کې روان تاوتریخوالي تایید یا ردولی نه شي.
د بلوچستان د ازادۍ پوځ وړمه ورځ په خُضدار کې د یوه ښار د نیولو او هلته دولتي ادارو ته د اور ورته کولو ادعا کړې وه چې وروسته دولتي چارواکو د هغوی ادعا تایید کړه.