تاند ( چهارشنبه د مرغومي ـ جدي ۵مه) نړیوال بانک ادعا کوي، چې افغانستان دمګړۍ د خوړو نه خوندیتوب له امله «شدید» ناورین سره مخ دی.
نړیوال بانک زیاتوي، چې په افغانستان کې میلیونونه کسان د کافي خوړو پیدا کولو په برخه کې ستونزې لري.
د دغه بانک په راپور کې راغلي، په افغانستان کې اوس ۱۱ اعشاریه ۴ میلیونه وګړي، چې د ټول نفوس ۲۵ سلنه کیږي د خوړو له نه خوندیتوب سره مخ دي.
راپور کې راغلي چې په افغانستان کې وچکالي او اقلیمي بدلونونو د خوړو نه خوندیتوب لا پسې سخت کړی دی.
د طالبانو حکومت تر اوسه دغه راپور ته غبرګون نه دی ښودلی.
نړیوال بانک داسې مهال دا اندېښنه ښیي، چې پرون سه شنبه د خوړو نړیوال پروګرام د مالي ستونزو له کمښته ویلي وو، چې په دې فصل کې د افغانستان ۶ ملیونه اړمنو وګړو ته مرسته نشي رسولی.