تاند (یکشنبه، د لیندۍ/ قوس ۱۸ مه) احمد الشرع، چې په ابومحمد الجولاني مشهور دی او د «هیئت تحریرالشام» مشر دی، د یکشنبې په ماسپښین دمشق ته له ننوتلو سره سم د ځمکې ښکلولو په حال کې لیدل شوی دی.

نوموړي تر دې مخکې د سوریې ملت ته په یوه رسمي پیغام کې، چې د دې هېواد په راډیو، تلویزیون او رسمي خبري آژانس سانا کې خپور شو، ویلي: «راتلونکې زموږ ده.»

احمد الشرع زیاته کړه: «بېرته ګرځیدل نشته. موږ پرېکړه کړې چې هغې لارې ته، چې له ۲۰۱۱ کال راهیسې پرې روان شوي یو، دوام ورکړو.»

احمد الشرع، چې د «جبهه النصره» غړی و، اوس ۴۲ کلن دی او د سعودي عربستان په پلازمینه ریاض کې زیږیدلی دی.

ده تېره اوونۍ د خپلو ځواکونو له خوا د حلب ولایت له ناڅاپي نیولو وروسته د دې لرغوني ښار د کلا لیدنه وکړه.

نوموړي په لومړي ځل په یوه اته دقیقه‌یي مرکه کې د سي‌این‌این خبریال ته د بشار اسد حکومت «یو مړی» وباله چې د روسیې او ایران د ملاتړ په زور ظاهراً ژوندی ښکاري.

له بلې خوا د ایران اسلامي جمهوریت د بهرنیو چارو وزارت د یوې اعلامیې په خپرولو سره د سوریې د یووالي، ملي حاکمیت او ځمکنۍ بشپړتیا پر درناوي ټینګار کړی او له راتلونکي حکومت سره یې د اړیکو د ساتلو غوښتنه کړې ده.

په دې اعلامیه کې، چې د یکشنبې په ورځ د لیندۍ ۱۸مه خپره شوې، ویل شوي چې د سوریې راتلونکی باید له بهرني مداخلې پرته یوازې د دې هېواد د خلکو په پرېکړه وټاکل شي.

د ایران د بهرنیو چارو وزارت د جګړو د ژر تر ژره پای ته رسېدو، د تروریستي اقداماتو د مخنیوي، او د ټولو ډلو په ګډون د ملي خبرو د پیل غوښتنه کړې ده.

وزارت دا ګامونه داسې ټول‌منلي حاکمیت ته د رسېدو لپاره اړین بللي چې د سوریې د خلکو استازیتوب وکړي.