تاند (دوشنبه، د لیندۍ / قوس ۱۹ مه) د رویټرز خبري اژانس د راپور له مخې، د سوریې ولسمشر بشار اسد او د هغه کورنۍ روسیې ته رسېدلي او روسي چارواکو ورته سیاسي پناه ورکړې ده.
د سوریې د ولسمشرۍ ماڼۍ او په دمشق کې د ایران سفارت لوټ شوي دي.
شاوخوا پنځه کاله وروسته له هغه چې د سوریې کورنۍ جګړه په نسبي توګه کراره شوې وه، د نوومبر په ۲۷مه (د لیندۍ ۷مه) له ادلب څخه پر حلب د اسلامي یاغیانو له حملې او د دې مهم ښار له نیولو وروسته، د دوی چټک پرمختګ نورو سیمو ته هم شدت وموند. اوس د بشار اسد د رژیم له سقوط سره په سوریه او سیمه کې نوي بدلونونه روان دي.
د فرانس پریس اژانس د راپور له مخې، د سوریې یاغیانو چې په چټکۍ سره بشار اسد نسکور کړ، د روسیې د پوځ د اډو امنیت تضمین کړی دی. د کرملین یوې سرچینې دا موضوع د یکشنبې په ورځ روسي خبري اژانسونو ته تایید کړه.
سرچینې د تاس او ریا نووستي دولتي خبري اژانسونو ته ویلي دي: «روسي چارواکي له وسلهوالو مخالفانو سره په اړیکه کې دي. د دې ډلو مشران په سوریه کې د روسیې د پوځ اډو او دیپلوماتیکو استازولیو امنیت تضمینوي.»
د اسلامي یاغیانو یا د هیت تحریر الشام له خوا د بشار اسد د رژیم له نسکورېدو وروسته، غلو او مجراغوښتونکو د ولسمشرۍ ماڼۍ، د اسد استوګنځی او په دمشق کې د ایران سفارت لوټ کړي دي. د یکشنبې په ورځ (د دسمبر ۸مه) په دې بریدونو کې، د ولسمشرۍ ماڼۍ د مېلمستون یوه برخه وسوځول شوه. د اسد استوګنځی، چې له ماڼۍ څخه څو کیلومتره لرې دی، نژدې بشپړ لوټ شوی دی.
د فرانس پریس خبریال په راپور کې ویلي چې د ولسمشرۍ ماڼۍ مېلمستون په اور کې وسوځېد. د اسد په استوګنځي کې نژدې ټول شیان غلا شوي دي. یوازې څو ټوټې فرنیچر، شته اسناد او د لرې کړل شوي ولسمشر یو انځور پاتې و. څو ساعته وروسته، لسګونه کسان، چې ښځې او ماشومان پکې شامل وو، د اسد استوګنځي ته ننوتل او هلته یې عکسونه واخیستل.
ابوعمر، چې ۴۴ کلن دی، وویل: «زه د غچ اخیستو لپاره راغلی یم، ځکه دوی موږ په بې ساري ډول ځپلي یو.» هغه، چې د اسد په مجلل استوګنځي کې د خپل موجودیت له امله ډېر خوشحاله ښکارېده، زیاته کړه: «زه نور له هیڅ شي نه وېرېږم. اوس یوازې دې ته فکر کوم چې سوریه وال سره یو ځای شي او خپل هېواد بیا جوړ کړي.»
په دمشق کې د ایران د سفارت لوټ
د فرانس پریس یوه عکاس راپور ورکړی چې په سفارت کې اداري دفترونه غلا شوي، فرنیچر مات شوي او د ښیښو ټوټې په ځمکه پرتې وې. هغه دا هم لیدلي چې حمله کوونکي له سفارت څخه شیان د سفارت مخې ته په دورل شویو لاريو کې باروي.
د سفارت دننه، المارۍ او د میزونو خانې خلاصې پاتې دي، اسناد، د ایران او سوریې بیرغونه او د رهبر عکسونه شړېدلي پراته وو، چې په دې کې د ایران د رهبر، علي خامنهيي، او د حزب الله د مشر، حسن نصرالله، عکسونه شامل وو.
د ایران دولتي ټلویزیون هغه ویجاړۍ وښودلې چې د سعودي شبکې العربیه له خوا ثبت شوې وې. په راپور کې راغلي چې «نامعلومو کسانو» پر سفارت برید کړی دی.
تهران ټایمز ورځپاڼې د ایران د بهرنیو چارو وزارت د ویاند اسماعیل بقایي په حواله راپور ورکړی چې ایراني ډیپلوماتانو له برید څخه مخکې سفارت تخلیه کړی و.