تاند (یکشنبه، د لیندۍ/ قوس ۱۸ مه) وسله والو سوري ياغيانو د يکشنبې په ورځ په دمشق ښار کې د سوریې د دولتي راډیو او تلوېزیون له نیولو وروسته په ژوندۍ بڼه د بشار اسد د حکومت د سقوط اعلان وکړ.
د سوریې صدراعظم محمد الجلالي د یکشنبې په ورځ وویل چې په سوریه کې باید آزاد انتخابات وشي ترڅو د دې هېواد خلک خپل مشر په خپله وټاکي.
محمد الجلالي له العربیه شبکې سره په خبرو کې تایید کړه چې د یاغیانو له مشر ابو محمد الجولاني سره په تماس کې دی چې د اوسني انتقالي پړاو د مدیریت په اړه خبرې وکړي. دا ګام د سوریې د سیاسي راتلونکي د جوړولو په هڅو کې یو مهم پرمختګ بلل شوی دی.
د سوریې د مخابراتو وزیر هم ویلي چې له یاغیانو سره په تماس کې دی.
محمد الجلالي زیاته کړه چې د بشار اسد او د سوریې د دفاع وزیر په اړه هیڅ معلومات نه لري. عیني شاهدانو ویلي چې نن سهار یاغیان د دمشق په ښار کې د ولسمشرۍ ماڼۍ ته داخل شوي او د “الله اکبر” شعارونه یې ورکول.
دې شاهدانو د جرمني خبري آژانس ته ویلي: “موږ ولیدل چې وسله وال کسان ماڼۍ دننه کېدل او الله اکبر نارې یې وهلې.“
دا ماڼۍ چې د “ملت ماڼۍ” په نوم پیژندل کیږي، د دمشق د لویدیځې برخې په مزه سیمه کې موقعیت لري.
په خواله رسنیو کې په خپرو شویو ویډیوګانو کې هم یاغیان په ماڼۍ کې دننه او د دروازو مخې ته ښودل شوي دي.
سرچینې وايي چې د سوریې ولسمشر بشار اسد لږ مخکې له دې پیښې له دمشق څخه تښتېدلی و.
داسې ښکاري چې یاغیان بې له کوم مقاومت څخه د ماڼۍ انګړ ته ننوتي دي. راپورونه وايي چې د ماڼۍ دننه دولتي کارکوونکي او امنیتي ځواکونه مخکې تر دې چې یاغیان هلته ورشي، وتلي وو.
په بریتانیا کې دېره، د سوریې د بشري حقونو د څار بنسټ مشر رامي عبدالرحمن اسوشېټېډ پریس خبري ته ویلي، چې اسد نن سهار له دمشق څخه په یوه الوتکه کې ووت.