تاند، شنبه، د جوزا ۳ مه: نن سهار د عامې روغتیا وزارت مرستیال وحید مجروع خبر ورکړ چې د لوګر ولایت مرکز پل علم کې پرې وسلوال برید وشو او دی ترې روغ ووت.
ښاغلي مجروح نن سهار پر خپله رسمي فیسبوک پاڼه ولیکل، چې نن سهار د لوګر ولایت پل علم ښار کې له یوه وسله وال برید روغ ووت او د خوست، پکتیا او لوګر ولایتونو ته په رسمي سفر تللی و.
د عامې روغتیا وزارت هم دغه پېښه تایید کړه او د ښاغلي مجروع د روغتیایي وضعیت په اړه یې تاند ته ډاډ ورکړ
خو تازه بیا د لوګر سیمه ییز چارواکي او د ولایتي شورا رئیس وایي، چې نن سهار د کابل او ګردیز پر لویه لاره هېڅ جنګ نه دی شوی.
د لوګر د ولایتي شورا رئیس حسیب الله ستانکزي رسنیو سره په خبرو کې د وحید مجروح خبرې رد کړې.
د ښاغلي ستانکزی په خبره، د نوموړي د مالوماتو له مخې وسله وال طالبان د پوهنې او روغتیا سکټور له کارکوونکو سره ستونزه نه لري او د دې ولایت په لیرې پرتو ناامنه سیمو کې خپل خدمات وړاندې کوي.
دی وایي، د لوګر څخه تېرېدونکي لوړپوړي چارواکي باید د دې ولایت امنیتي ځواکونو مسوولین په جریان کې کړي څو د دوی امنیت وساتي.
د ښاغلي مجروح دا خبره د دې ولایت د والي ویاند او د امنیه قوماندانۍ مسوولینو هم رد کړې او په خبره یې په لویه لاره هېڅ جنګ نه دی شوی.
خو د عامې روغتیا وزارت بیا تازه د لوګر د امنیتي مسوولینو د خبرو په اړه څه نه دي ویلي.
بل لور ته تر اوسه هیڅ کومې وسلوالې ډلې هم د دې برید په اړه رسنیو ته څه نه دي ویلي.