تاند ( یکشنبه د لیندۍ/ قوس ۱۱مه) د پاکستان په وروستیو لاریونونو کې د پاکستاني چارواکو له لوري د افغانانو د نوم اخیستو په غبرګون کې د طالبانو حکومت ویلي، افغان مهاجر له دې امله اندېښنو سره مخ دي،چې ښایي پاکستاني پولیس یې یوځل بیا په دې پلمه په ناحقه وځوروي.
اسلام اباد کې د طالبانو د حکومت سفارت وایي افغان کډوال د پاکستان په سیاسي فعالیتونو کې ښکیل نه دي او د دغه هېواد په اقتصادي پیاوړتیا کې یې تل سوله ییزه ونډه اخیستې.
د سفارت په خبر پاڼه کې له پاکستاني لوري غوښتل شوي، چې له داسې خبرو دې ډډه وکړي چې د افغانانو د ځورونې او جبري بې ځایه کېدو لامل ګرځي.
خبرپاڼې زیاته کړې، دغه ستونزه به د دواړو هېوادونو ترمنځ بې باوري نوره هم زیاته کړي.
د یادونې ده، چې پاکستان او ایران کې په بېلابېلو پلمو افغان کډوالو د یادو هېوادونو د پولیسو له لوري له ځورونې سره مخ کېږي، چې پایله کې یا زنداني یا په جبر کډوالۍ ته مجبورېږي.