تاند (شنبه، د لیندۍ/ قوس ۱۰ مه) د ایران، هند، افغانستان او ازبکستان د درېیمې ګډې کاري ډلې په غونډه کې د سوداګریزو معاملو اسانتیاوې او د سوداګري مالونو د لېږد او ترانسپورت اړوند موضوعات وڅېړل شول.
د ایران د بندرونو او سمندري چارو سازمان په وینا، دا غونډه په هند کې د ممبۍ په ښار کې ترسره شوه، چې په هغې کې د چابهار بندر د بندري او اقتصادي چارو مرستیال حسین شهدادي ګډون درلود.
ګډونوالو د ترانسپورتي ظرفیتونو، زیربناوو، او د دې برخې اړوند خنډونو په اړه خبرې وکړې.
د غونډې له اجنډا سره سم، د سوداګریزو معاملو د اسانتیا لپاره یو شمېر وړاندیزونه وشول. په دې سربېره، د چابهار له لارې د توکو د ترانسپورت او ترانزیټ موضوعات هم وڅېړل شول.
په دې غونډه کې د هند د بندرونو، کښتۍ چلونې او اوبو وزارت چارواکو، د ازبکستان، افغانستان، او ایران سفیرانو، او هندي ډیپلوماټانو ګډون کړی و.